Hajiji guminambar miampai tongo’ mamaramit ponguhupan Mutusikol
KOTA KINABALU: Koporintaan Pogun toririmo minggisom poposodia’ kopogisusuaian ‘modal insan’ pogun diti montok poposindak po do kosunion ikonomi kopiongoi di Hontolon Sabah Maju Jaya (SMJ), ka di Boyoon Montiri, Datuk Seri Hajiji Haji Noor.
Ka disio, kopoburuan modal insan oponsol kopio montok kosunion om koburuon po’ompus Sabah, i kouhup kumaa komogoton ikonomi om koinsawaton kasasanangan mogigiyon, mongunsub kopohompitan pamantangan sosial, nogi’ kopo’iliu pogun lobi koponokitopong id nayatan pomogunan.
Kohondot dilo’ ka disio, Ababayan Balajaran om Pintoriningan Teknikal om Vokasional (TVET) kapapanau tonggungan di oponsol id inggisaman popoburu’ modal insan di gunoon montok kopoburuan ikonomi pogun.
“TVET diti okon ko’ monginggonop nopo do tulun miampai komilaan nga nogi’ kopotonggoi do kapagarasan, kosiwatan pakarajaan om kosunion ikonomi, suai ko’ kopongunsub ‘inovator’, mongungusaha’ om pakakaraja’ kikomilaan i kopongunsub kumaa komogoton pogun Sabah,” ka disio id Ramai Kinapatahakan Ponguhupan BIZRIDER Mobile Mechanic Programme om Setifikit Pisokodungan id piaaltan Bohogian Kikuasa’ Koburuon Ikonomi om Kopoopuan Sabah (SEDIA), Politeknik om Kolej Komuniti (POLYCC) Zon Sabah doid Lintuhun Rafflesia, Politeknik Kota Kinabalu di tadau baino’.
Hajiji pinapatahak ponguhupan mutusikol kumaa mamaramit.
Hajiji i po nogi’ Ponorikohon SEDIA minoboros, Koporintaan Pogun monokodung poinponu’ inggisaman i manahak kosiwatan kumaa komulakan Sabah mongingkawas rontob kolokuon graduan TVET.
“Ababayan TVET kosudong kopio id inggisaman Sabah montok tumilombus popoburu’ siktor ikonomi dau i sokodungon do Palan Kopoburuan Hontolon SMJ. Ilo’ nga’ koposodia’ nogi’ graduan montok sumili ginaras karaja’ kikomilaan om koponginkuri’ katalahanan kumaa pakakaraja’ songkosuayan.
“Sabah kiharo intodonon sandad, tumau om gas, pomutamanan om siktor kopoopuan orohian popomogot siktor kapamansaian kopiongoi di inggisaman koporintaan i pinopoloting mogisusuai inggisaman montok papatantu’ kosunion ikonomi aanu mongingkawas,” ka disio.
Hajiji suminasi’ kinapatahakan setifikit pisokodungan pialatan Politeknik om Kolej Komuniti (POLYCC) Zon Sabah miampai Luguan Eksekutif Bohogian Kikuasa’ Kopoburuan Ikonomi om Kopoopuan Sabah (SEDIA), Datuk Seri Haji Hashim Paijan.
Minoboros isio, koporintaan nakalantoi minogowit ogumu’ papaapu’ labus pogun minongukab pongindopuan kapamansaian doid pogund iti miagal do ‘loji kerajang tembaga’ do SK Nexilis om ‘loji kaca solar’ Kibing i momoguno kopio kukumaraja’ kitoilaan.
Ka disio, Sabah nokoposurat ginumu’ koinsanai kopoopuan soginumu’ RM9 bilion montok timpu onom wulan kumolimpuunon toun diti (2023), nung piadangon di kiginumu’ no do RM6 bilion di toun 2021 om RM11.5 bilion montok 2022.
“Id timpu no do onom wulan toun diti, Sabah nokosigampot 79% mantad ginumu’ koinsanai kopoopuan montok toun 2022. Iti nokoposili Sabah pogun kolimo id Malaysia i nokoposurat rikod kopoopuan di bobos akawas mantad wulan Koiso’ gisom Ko’onom 2023. Iti nga’ nokopokito nogi’ do Sabah noondo diti id solug kopotundaan di kohunung nosusuhut kiharo koyuon pulitik di aadas,” ka disio pinoposotol.
Tumanud disio montok papatantu’ Sabah kotilombus kiginaras tumopong kopiongoi di tongo’ pogun ngaawi’ suai id Malaysia, Koporintaan Pogun papaapu’ doid toilaan, komilaan om kogorison mogigiyon montok kalantaion om komogoton timpu dumontol.
“Ilo’ pogi’ di kolimpuunon tulan diti, minomuruan oku do misi pidagangan id labus pogun ilo’ nopo nga’ kuminaa id China om Hong Kong montok pinopointutun kosiwatan pongindopuan om kopoopuan id Sabah kumaa mangangapu’ mantad China om Hong Kong.
“Koporintaan pogun nga’ nokopikogos nogi’ Memorandum Pihunungan (MoU) miampai Huawei Technologies Malaysia Sdn. Bhd. montok monginsikap inggisaman koposimbanan digital pogun diti. Kohondot dilo’, yati’ koinsanai kiguno sumodia’ sabab tantu’ no do koinsanai kopogowit lobi kogumu’ papaapu’ do rumikot, i kirati mumu’-gumu’ kosiwatan pakarajaan kumaa tangaanak id pogun diti,” ka disio pinoposotol.
Karait Ababayan Koridor Koburuon Sabah (SDC) – Sabah Talent Enchancement Programme (SSTEP) om Ababayan #BIZRIDER300, ka di Hajiji, soginumu’ 3,116 tutumanud di pinotorining maya’ 280 ababayan i pinoindalan kapaampai pintoriningan ‘reskilling’ om ‘upskilling’, pitumaan pakarajaan nogi’ kosiwatan mongindapu’.
Ka disio, Ababayan #BIZIRIDER300 i pinoimpuun di ko 14tw Koturu’ 2022, soginumu’ 100 komulaakn nakaramit ponguhupan mutusikol om pitumaan pakarajaan sabaagi tambalut papaatod takanon maya’ pisokodungan miampai komponi papaatod takanon bobos agayo id Malaysia.
Soginumu’ 15 mutusikol maan patahako’ kumaa tongo’ alumni Politeknik om Kolej Komuniti i poindalanon sabaagi mekanik manau-panau.
