Hajiji (gibang) miniboros piromutan pidagangan misulak miampai di Lee.
KOTA KINABALU: Boyoon Montiri (KM), Datuk Seri Hajiji Haji Noor minomupus misi pidagangan kumoiso’ disio kumaa labus pogun miampai ruminuba’ di Buruan Eksekutif Watas Pomorintaan Pinotomod Hong Kong, John Lee Ka-Chiu id upis disio doid Hong Kong di tadau baino’ montok mongukab ralan kumaa piromutan misulak.
Hajiji pinopoilo Lee do hilo’ isio id Shenzhen doid watas Guangdong montok papatahak boboroson doid Pitimungan Limunsuk Ikonomi om Tiknologi Cina Global (GCET) di tadau Koiso’.
Minoboros isio, koporintaan Sabah om Huawei Technologies minisain nogi’ Memorandum Pihunungan (MoU) id Longkod Upis Huawei doid Shenzhen.
Montok pongingitanan …. Hajiji (kaapat, wanan), Lee Ka-Chiu (kotolu, wanan), Phoong (kaapat, gibang), Sheng (gibang)om i Chan(koduo, wanan) katalib mitingan.
Boyoon Montiri minoboros, montok mongingkawas piromutan misulak, koporintaan Sabah orohian popironit piromutan miampai monunurat koupisan poinggompit doid Hong Kong.
“Orohian oku mintong Sabah sumili wawaya’an sumuang Asia Tenggara om BIMP-EAGA o kosuul no,” ka disio.
Hajiji nga minanahak kopointalangan kumaa di Lee karait kaganaan kopoopuan agayo Sabah ilo’ nopo nga’ Siktor Ginoris; Pomorunan ‘Intensi” Ginaras Osiriba; Produk Mantad Tiknologi Otomou; Projik Hilir Biojisim; Pamansaian Takanon; Kakamot Pongubatan; Tumau om Gas; Ponombuluyan om Pomorunan Wagu.
Lee minoboros, poinsodia’ isio montok papahapak piromutan id pialatan Hong Kong om Sabah montok mongukab waya’an montok lobi kogumu’ pidagangan om kaganaan pisokodungan gododuo.
“Indadon dahai pialanan pialatan koporintaan montok monginggirot piromutan,” ka disio, i pinopoilo do kaganaan suai i aanu timbangon do Sabah nopo Bon Obulou om Otomou sabab Hong Kong id nindikohonon di bobos akawas doid siriba’ Hong Kong Investment Corporation Limited montok monoluod projik kopotundaan.
Lee magalap po nogi’ Sabah papaharo pokikitanan pidagangan id Hong Kong montok popokito produk om koponsolon pongindopuan Sabah.
Minoboros isio, Sabah nopo nga’ rikoton ponombuluyan nointutunan montok mogigiyon Hong Kong om koporintaan disio masaan mogihum montok mongimbulai lobi kogumu’ waya’an ponombuluyan i kapanahak koundaran kumaa goduduo bohogian.
Lee minangakun do Sabah nosili mongungudar oponsol takanon rahat kumaa Hong Kong om pinopoilo do haro kosiwatan montok asil takanon di suai nogi.
Minananud di Hajiji nopo Montiri Koburuon Pomorunan om Mongindapu’ Sabah, Datuk Phoong Jin Zhe; Monunurat Koporintaan Pogun, Datuk Seri Sr. Safar Untong om Ponorikohon Kounsol Monontuduk Ikonomi Sabah, Tan Sri David Chu.
Tanak Mamasok Sabah, Tan Sri Andrew Sheng i po nogi puru Kounsol Monontuduk Buruan Eksekutif Koporintaan Hong Kong om Monunurat Muda Pidagangan om Koburuon Ikonomi Hong Kong, Bernard Chan nga’ nokotindapou.Montok pongingitanan …. Hajiji (kaapat, wanan), Lee Ka-Chiu (kotolu, wanan), Phoong (kaapat, gibang), Sheng (gibang)om i Chan(koduo, wanan) katalib mitingan.
