Juliah guminambar miampai toinsanan tombului id Ababayan Mongindapu’ Jhewanita Toun 2023, id Lintuhun Mogigiyon Tawau di tadau baino’.
KOTA KINABALU: Koporintaan Pogun pinopoobi’ soginumu’ RM2.4 riong kumaa Koupisan Hal Ngaawi’ Koonduan Sabah (JHEWA) id Bajet Pogun 2023 montok popoindalan mogisusuai projik om ababayan kopoburuan koonduan id Sabah, ka di sawo di Boyoon Montiri, Datin Seri Juliah Salag.
Ka disio, wokon ababayan om projik di pinoindlaan do koupisan dilo nopo Ababayan Mongindapu’ Ibu Tunggal, Projik Kopoburuan Mongindapu’ Koonduan om susuai i moningkanan tongo’ tina’ songulunan, tondu’ nasawo kinindopuan osiriba’ id kategori B40 om mongungusaha’ koonduan.
Minoboros isio, koporintaan Pisompuruan maya’ Bajet Madani 2023 nga’ pinopoobi’ pipiro kousinan kapamayaran montok monguhup mongindapu’ koonduan, wookon dilo’ kogogonopan kapangalasan mantad mogisusuai kotinanan kousinan miampai dana poinsodia’ soginumu’ RM1.7 bilion.
Maan paagalan ka disio, Bank Simpanan Nasional (BSN) pinoposodia’ dana soginumu’ RM300 riong montok monokodung pongindopuan mikro i poburuon do mongindapu’ koonduan om komulakan, naamot kapangalasan lobi RM1 bilion pouyuhon kumaa PKS mikro om mongingindapu’ i kituduan monguhup monginggaan tonggungan di tongo’ mongindapu’ koonduan.
Juliah minooi intong gerai pokikitanan om kapadagangan kopihondot Ababayan Mongindapu’ Jhewanita Toun 2023, id Lintuhun Mogigiyon Tawau di tadau baino’.
“Koporintaan opoduli’ kopio di koburuon do koonduan id pogun diti om toririmo minggisom nogi’ mogihum ralan papagaras ikonomi koonduan id kaganaan pongindopuan,” ka disio ontok pinopoimagon pomupusan Ababayan Kousahawanan Jhewanita Toun 2023 id Lintuhun Mogigiyon Kounsol Kakadayan Tawau (MPT) di tadau baino’.
Ababayan mongindapu’ dilo’ i pinaanjur do JHEWA naampai di 350 tulun tutumanud kapaampai diolo’ i tutumanud kurusus komilaan pinaanjur koupisan dilo’ mongindapu’ koonduan mantad pososorili’ watas Tawau.
Ka id Juliah, koporintaan pogun maya’ Palan Koburuon Hontolon Sabah Maju Jaya (SMJ) nga’ pinoposodia’ mogisusuai ababayan om inggisaman montok papagaras tongo’ mongindapu’ id pogun diti om mongindapu’ koonduan kiguno monokisolod kosiwatan om momoguno ponguhupan om kapangalasan i pinosodia’ do koporintaan montok popoinggayo pongindopuan diolo’.
Ka disio, kopongindopuan i ampayaton do koonduan agayo kopio kapaampai mongindapu’ digital, takanon om surupukaraja (hospitaliti), pomorunan kreatif, tiknologi, siktor kolumison om ogumu’ po.
Juliah monongkirumo miampai dilo wookon mingluluda’ ontok tuminombului doid Longkod Pemulihan Dalam Komuniti (PPDK) Kem Kabota Tawau di tadau baino’.
“Mantad dilo’ koonduan do noondo okito lobi aparagat gumompit id mogisusuai siktor pongindopuan. Nakapapanau yolo’ tonggungan oponsol id pomogunan pongindopuan, monsupu’ inovasi, om mogisuaian kaganaan di suai.
“Sundung mongindapu’ koonduan asaru’ kotoguang kaantaban di poinsusuai, kaamapi no amu’ kopiadangan kaganaan karaja’ om kolominan, nga’ okon ko’ kohimpogong ilo’ do lumantoi sabab ogumu’ sokodung om pongunsuban di pinatahak montok monokodung inggisaman koonduan. Koonduan nga’ nokopokito nogi’ do kabaahan diolo’ montok monsupu’ kalantaion id kaganaan pongindopuan, okon nopo ko’ id Sabah nga’ nogi’ id poliliput Malaysia,” ka disio.
Juliah minangatag nogi’ di tongo’ mongindapu’ nakatanud kurusus, seminar toi ababayan pinsingilaan kapaampai kaganaan pongindopuan do mongingkawas komilaan, ninsingilaan om toilaan kapaampai pongindopuan om kopoburuan nogi’ sumili mongindapu’ di kalantoi sabaagi ombitanan, pongunsub om angkab montok monigampot kalantaion id kaganaan dilo’.
“Sabaagi songulun konoduan, yati’ okon nopo ko’ kapapanau tonggungan oponsol id koponuriodngan sinakagon dumontol, nga nogi’ koponguhup doid kosunion ikonomi pomogunon. Kohondot dilo’, toririmo ku monokodung om lumansan kalantaion di tongo’ mogindapu’ koonduan id Sabah, mooi do kotopong di kalantaion tongo’ mongingindapu’ nabantug i nakalantoi pinoposurat ngaran om kinalantaion doid kaganaan pongindopuan di ampayaton,” ka disio.
