Hajiji (gibang) id pinibabarasan miampai di Ahmad Fahmi.
KOTA KINABALU: Boyoon Montiri (KM), Datuk Seri Hajiji Haji Noor minanahak jominan do Koporintaan Pogun papatantu’ Palan Piromutan Digital Negara (Jendela) koindalan miampai oturundus id Sabah.
“Koponuhuan ku atalang. Koinsanai bohogian kikuasa’ nokoiyonon (PBT) om upis watsa mositi’ papasanang mooi do projik id siriba’ Jendela doid pogun diti aanu popoindalan miampai oturundus,” ka disio ontok miniruba’ di Montiri Piromutan om Digital, Ahmad Fahmi Fadzil doid upis disio id Menara Kinabalu, do hiti, di tadau baino’.
Wookon hal di pinibabarasan nopo monginsikap ababayan Jendela montok monigampot rikoton 100 pihatus kooputon internet dumontol koompokon 2025.
Hajiji pinapatahak tandamato kuminaa di Ahmad Fahmi.
Pinibabarasan nogi’ o atag kopogulian kawagu 300 pioputan satelit ‘Terminal Apertur Sangat Kecil’ (VSAT) id koiyonon labus kakadayan doid Sabah, mongingkawas ginumu’ Longkod Ikonomi Digital PEDI mantad 118 kumaa 200 om monginsikap kopomongohan menara maso-maso om PoP (titikid kehadiran di sekolah) kapamansaian om kapadakatan.
Minananud di Ahmad Fahmi i Luguan Monunurat Komontirian Piromutan om Digital, Datuk Mohamad Fauzi Md Isa; Luguan Potunud Kosolimbahan, Datuk Suhaimi Sulaiman; Luguan Potunud Koupisan Kopointalangan, Dato’ Mohd. Sukari Ab Hamid om i Ponorikohon Suruhanjaya Piromutan om Multimedia Malaysia (SKMM), Tan Sri Mohamad Sallim Fateh Din.
