Hajiji tinanud di Masiung, Bernard om i Nelson pinapatahak garan tana’ tanak pogun kumaa mobi’ mogigiyon kampung id Ababayan Kinapatahakan Garan Tana’ om Kopoimaganan Kampung id Lintuhun Poingukab Dataran Rakyat Tongod di konihab.
TONGOD: Koporintaan Pogun pinapatahak 421 garan tana’ tanak pogun kumaa mogigiyon mantad 15 kampung id watas Tongod kapaampai ginayo 790.37 hektar (1,943.15 ekar).
Boyoon Montiri, Datuk Seri Hajiji Haji Noor pinapatahak garan tana’ ngaawi’ dilo’ ontok kinotombuluyan karjaa’ disio id Tongod di konihab.
Ka disio, wookon kampung di nakaampai nopo nga’ Kampung Simpang Entilibon kiginumu’ 127 garan tana’, Kampung Imbak (94 garan tana’), Kampung Kironggu (55 garan tana’), Kampung Kotodon (43 garan tana’) om Kampung Alitang (37 garan tana’).
Hajiji guminambar miampai di Masiung, Bernard, Nelson om tongo’ lansanon mogigiyon i minongobi’ mogigiyon kampung minamaramit garang ngaawi’ tana’ om Kopoimaganan Tana’ Rizab Tiiyonon Tanak Pogun id ababayan kinapatahakan doid Lintuhun Poingukab Dataran Rakyat Tongod di konihab.
Ka disio mantad ginumu’ garan tana’ dilo’, 343 garan nopo nga’ mantad Ababayan Surupukaraja’ Tana’ Adat Tanak Pogun Sabah (PANTAS) om noopod dilo’ 78 garan mantad kinopongupalaian tomod.
Hajiji pinapatahak nogi’ do Kinopoimaganan Tana’ Rizab Tiyonon Tanak Pogun kumaa apat kampung, kapaaampai Kampung Tempasuk kiginayo 77.587 hektar (191.214 ekar), Kampung Imbak kiginayo 7.25 hektar (17.915 ekar), Kampung Linayukan,15.831 hektar (39.119 ekar)) om Kampung Namukon, 4.047 hektar (10.00 ekar).
Nokotindapou nogi’ id ababayan dilo’ i Puru Lintuhun Undangan Pogun (ADUN) Kuamut, Datuk Masiung Banah; Potunud Koupisan Tana’ om Monukat Pogun, Datuk Bernard Liew; Upisor Watas Tongod, Nelson Domil Oluk om lansanon mogigiyon nokoiyonon.
Hajiji miampai dii Masiung, Bernard om i Nelson id Ababayan Mamabak Tana’ Linimput Kuut Tanak Pogun Tongod id koiyonon projik dilo’ doid Tongod di konihab.
Nokopogulu, i Hajiji pinopoindalan kapamabakan tana’ projik ponuridongan linimput Kuut Tanak Pogun (MKN) Tongod.
Nonuan isio kopointalangan projik ponuridongan linimput MKN dilo’ di Nelson.
Projik kigatang RM5,101,390 dilo’ tinimpuunan ponuridongan di wulan Koonom, 2023 om pikikiro opongo wulan Kohopod om Duo 2024.
Hajiji pinapatahak nogi’ do Tana’ Rizab Koiyonon Linimpuut Kuut Tanak Pogun Watas Tongod kuminaa di Luguan Watas Tongod, OKK Jusison Saidin.
