Dr. Jeffrey Kitingan
KOTA KINABALU: Iso’ katatapan kumaa geran pinotomod 40 pihatus kumaa Sabah i alaid no do noundarangan pikikiro aanu monigampot suang timpu 12 wulan, ka di Kumoduo Boyoon Montiri I, Datuk Seri Dr. Jeffrey Kittingan.
Minoboros isio, kootusan dilo’ winonsoi di Puruankuasa’ Teknikal Pibatosan Malaysia (MA63), i pinonorikohon di Kumoduo Luguan Montiri, Datuk Seri Fadillah Yusof i nakaakun momoguno katatapan dilo’.
Dr. Jeffrey pinoposotol do manalasai hal diti, i amu’ po nasasalasai pointonod 58 toun nakatalib, nopo nga’ oponsol montok patantu’ Sabah karamit kopotutan dau.
Mongobi’ Koporintaan Sabah id Puruankuasa’ MA63, Dr. Jeffrey pinoposotl do Koporintaan Pisompuruan, id siriba’ kopomuruanan di Luguan Montiri, Datuk Seri Anwar Ibrahim minamatos monumboyo’ kopotutan koundangan di notingkodan.
“Rayat Sabah minindad lobi sitanga’ abad montok timpu diti, om nosili tonggungan tokou montok papatantu’ pogindadan dilo’ amu’ nodi koinaru,” ka disio id iso’ kointalangan di tadau baino’.
Dr. Jeffrey pinopoimagon om mamagatang kopoobian geran pinotomod ‘interim’ kiginumu’ RM300 riong mantad Putrajaya, nga’ minoboros do iti apatut do kitonggungan nopo sabaagi panalasaian naamot.
“Kopoobian naamot dilo’, sundung agayo, nga’ wookon no mantad di nunu i apatut patahakon kumaa Sabah. RM300 riong dilo’ tantu’ nopo do iso’ laang di osonong, nga’ tingkananon tokou nopo kopio nga’ mamagampot 40 pihatus asil oborisi’,” ka disio.
Puru Parlimen Keningau dilo’ minoboros, karalano’ wagu amu’ nuru’ montok manahak kopotutan asil pinotomod dilo’.
Pinosotol disio Koundangan Pisompuruan nokoposodia’ karalano’ di atalang montok diti, miagal di pinointalang id Perkara 112D, 112C om 112C(6), mitonggoi do Perenggan 24 Ruputan IGC.
“kointalangan toi data di gunoon montok pongintoban diti aanu om kiguno posodiaon do kotinanan Pisompuruan miagal Komontirian Kousinan om Kotinanan Asil Suang Pogun Malaysia (LHDN). Palan karaja’ dilo’ haro, i nopo gunoon tokou do noondo nga’ kointalangan di kosudong,” ka disio.
Pinaatag nogi’ disio mooi do Sarawak momoguno karalano’ di miagal do Sabah, okon ko’ momonosoi karalano’ di sopisuai.
“Otumbayaan oku do piadasan dilo’ okon nopo ko’ koowit kogiroton nga koponginsikap do kapanalasaian om mongilag koloidon di potilombus,” ka disio.
Daamot dilo’, Dr. Jeffrey pinopointalang do pinomoromitan geran RM300 riong mantad Koporintaan Pisompuruan amu’ kasaga’ pasalaon pamarati sabaagi Sabah magada’ do kopotutan dau kumaa di asil oborisi’ 40 pihatus.
Nga’, ka disio, ilo’ nopo nga’ laang ‘stopgap’ nanamot inggisaman mogihum panalasaian kumaa hal kopio aanu monilombus.
“Koporintaan Gabungan Rakyat Sabah (GRS) toririmo tumopot manamong kopotutan om koponsolon Sabah. Totondos pembangkang do GRS nokoowit do Sabah natagakan kopotutan 40 pihatus asil oborisi’ nopo nga’ aiso’ pinoimpahan om kopongumang-umangan di po’ompus kumaa pomorintaan tokou.
“Pokionuon dahai oinsanan bohogian kosuul no Koporintaan Pisompuruan do manahak sokodung om papatantu’ hal diti asalasai id timpu di pinatantu’.
“Montok koundaran rayat Sabah kiguno tokou maganu kopotutan 40 pihatus asil oborisi’ pogun, mongumolig ‘autonomi’ (kuasa’) pogun, om tumilombus popoburu’ ikonomi tokou montok kasasanangan rayat tokou,” ka disio.
