Hajiji Haji Noor
KOTA KINABALU: Koporintaan Pogun pinopoobi’ soginumu’ RM12 riong toun diti montok monguhup soginumu’ 1,600 tinan sikul kabansana om sikul mananga’ id Sabah id siriba’ ababayan Ponguhupan Ihsan Sikul Sabah (BISBAH), ka di Boyoon Montiri, Datuk Seri Hajiji Haji Noor.
Ka disio, sikul ngaawi’ dilo’ karamit ponguhupan kapaampai kogogonopan miagal komputer, LCD projektor, printer, Smart TV, ponogit tongus om pomologod rolou piowit-owit i patahakon do mogisuhut-suhut.
Minoboros isio, BISBAH nopo nga’ wookon inggisaman ponguhupan balajaran i pinosodia’ do Koporintaan Pogun montok papagaras do naangayan balajaran id pogun diti.
“Iti kopiongoi di Palan Kopoburuan Hontolon Sabah Maju Jaya (SMJ) miampai kopoburuan ‘modal insan’ nopo nga’ wookon ababayan i nonuan koposotolan do Koporintaan Pogun,” ak disio id Ababayan Kinapatahakan Ponguhupan Balajaran om Gaa’ Kecemerlangan Balajaran Pogun Sabah Toun 2023 id Longkod Konvensyen Sompomogunan (SICC), do hiti, di tadau baino’. Teks boboroson disio binasa’ di Montiri Sains, Tiknologi om Inovasi Pogun, Datuk Dr. Haji Mohd. Arifin Mohd. Arif.
Hajiji minoboros, Koporintaan Pogun nga’ pinopoobi’ nogi’ soginumu’ RM7.5 riong kumaa susumikul i maganu poporisaan SPM, STPM om STAM miampai bayaran soginumu RM200 songulun maya’ Ponguhupan Pinotomod Tunai Poporisaan (BAKTI), i momorikot soginumu’ 38,000 tulun susumikul id nayatan paganakan B40 om M40.
“Koporintaan Pogun nga’ mintong poinwagat kohondot kopomogunaan kousinan i potoguang di tinimungan B40 lolobi no montok pambayar porojistoran mongoput balajaran tangaanak kumaa Kotinanan Pinsingilaan Akawas (IPT). Kohondot dilo’, Ponguhupan Tunai Porojistoran IPT Miampai Insan-insan (BUDI) pinointutunan di toun nakatalib om tinilombus po do toun diti.
“Ponguhupan Ihsan Tabungan Balajaran Pogun (BISTARI) kiginumu’ RM1 riong kumaa Kotinanan Tabung Balajaran Akawas Nasional (PTPTN) i pintahak kumaa mamaramit di kosudong maya’ Skim Pinoopi’ Balajaran Nasional (SSPN),” ka disio pinoposotol.
Ka disio, Ponguhupan Koponginsonongan Okoro’ Sikul (BALKIS) i pinointutunan toun diti miampai kousinan soginumu’ RM4 riong montok monguhup monginsonong kinaraagon om koponginsonongan i kapaampai gatang id siriba’ RM50,000 om poinsiriba’.
Minoboros isio, Ponguhupan Ihsan Komputer (BAIK) i momorikot susumikul Sabah mantad tinimungan e-Kasih i masaan minsingilo id IPT om aiso’ kosukupan montok momoli komputer miampai tuduan pinsingilaan nga’ tinilombus nogi’ do toun diti miampai kousinan soginumu’ RM2 riong montok rikoton 1,000 komputer piowit-owit.
Ka di Hajiji, tonggungan suai Koporintaan Pogun kaampai no Ponguhupan Pinotomod Ababayan Balajaran (BANTU) miampai kousinan soginumu’ RM500,000. Sekretariat Mahasiswa Sabah Malaysia (SEMESTA) nga’ pinoimpuun montok susumikul Sabah id suang om labus pogun.
“Kousinan soginumu’ RM500,000 nga’ pinoobi’ nogi’ montok Koisaan Susumikul Sabah i poinrojistor id siriba’ SEMESTA montok popoindalan tongo’ ababayan koisaan,” ka disio kawagu.
Lumansan isio oinsanan inggisaman ponguhupan balajaran i pinosodia’ Koporintaan Pogun aanu momoguno poinsonong di oinsanan mamaramit, potilombus dino kounsub sunduan diolo’ montok lobi kopinogot monilombus pinsingilaan om potilombus dino koposurat kalantaion di osonong id timpu dumontol.
Naamot dilo’, minoboros i Hajiji, ‘Human Capital Development Blue Print for Sabah (2021-2025)’ pinosodia’ montok papatantu’ sukatan balajaran, toilaan komilaan om kabaahan komulakan nogi’ modal insan, toririmo kosudong, suai ko’ kosili puralan montok ababayan kopoburuan modal insan miampai po’ompus id pogun diti.
Ka disio, Koporintaan Pogun tumilombus popoindalan ababayan pingludaan komilaan kaampai TVET i kosudong miampai kopomogunaan pomorunan maso-maso om monginsonong kogogonopan om kakamot pnoguhupan pingludaan id tongo’ kotinanan pingludaan id siriba’ tongo’ kotinanan koporintaan id pogun diti.
“Kaganaan balajaran toririmo onuan koposuulan do koporintaan. Iti sabab no do balajaran oponsol montok monimban konosipan tanak tinaru. Tangaanak wagu do noondo diti kiguno mogindai mantad oburunsut di pomusarahan okikip om kapamaraag pomusarahan.
“Yolo’ kiguno pogkosusuon miampai pomusarahan di kiginoris monokitopong nogi’ toririmo mogiinsolod montok momogusa’ kalantaion,” ka disio pinoposotol.
