Hajiji Haji Noor
KOTA KINABALU: Datuk Seri Hajiji Haji Noor nopo nga’ Boyoon Montiri Sabah kumoiso’ pointonod di 1970 i pinapaharo kopogintongan kawagu Perkara 112D di otopot miampai Koporintaan Pisompuruan.
Asil dilo’: “Miampai aiso’ ‘prejudis’ kumaa kapanahakan pinotomod 40% id Art.112C’; patahakon kumaa Sabah pinoinsawat mantad RM26.7 riong id siriba’ Perintah 1970 kuminaa RM125.6 riong montok 2022 om RM129.7 riong ontok 2023 id siriba’ Perintah 2022 di wagu.
Tumanud isio’ kointalangan di tadau baino’, pialatan toun 2022 om 2026 Sabah karamit RM669.8 riong miampai koinsanai, naamot id siriba’ pinomorintaan koporintaan Parti Warisan (Warisan) pogulu diti, Sabah karamit no do RM267 riong.
Id siriba’ Perkara 112D Koundangan Pisompuruan, kiguno haro kopogintongan kawagu kapanahakan pinotomod kumaa Sabah do tikid limo toun.
“Di toun 2018, Warisan amu’ nakalantoi pinapaharo nunu-nunu kinopogintongan id siriba’ Perkara 112D.
“Sabalik dilo’ Warisan minongudut id Bajet Pisompuruan miampai pinopoboros do kinapatahakan pinotomod dilo’ pinilipat mantad RM26.7 riong kuminaa RM53.4 riong. Iti nopo nga’ amu’ otopot sabab kinapanahakan pinotomod id siriba’ Perkara 112C om 112D aanu no do popoinsawat katalib o kopogintongan koundangan.
“Aiso’ pinogintongan kawagu id siriba’ Perkara 112D i noumbalan pinapaharo id siriba’ koporintaan Warisan,” ka do kointalangan dilo’ kawagu montok minonimbar ponguhotan do pembangkang kohondot hal diti.
Kointalangan dilo’ minoboros, Koisaan Undanga-undang Sabah (SLS) amu’ insan panaman Koporintaan Sabah. Om nogi’ i Hajiji sabaagi Boyoon Montiri minonuhu mooi do Koporintaan Sabah tumanud do kinopogintongan kohokiman sabaagi ‘Responden’ mooi do Sabah kaanu popoburu’ kopotutan dau id toguang Kuut.
“Koporintaan Sabah monokodung kopotutan montok manaman Koporintaan Pisompuruan nung amu’ yolo’ mangakun toi papatahak kopotutan Sabah id siriba’ Perkara 112C om 112D.
“Warisan sala’ do hal diti id toguang Kuut Akawas di wulan Kosiam. Om nogi’ Kuut Akawas di tulan Kohopod om Iso’ 2022 minanahak kapasagaan kumaa SLS montok monilombus pogintongan kohokiman. Koporintaan Sabah minonokodung SLS id kopokionuan kasagaan pogintongan kawagu kohokiman diolo’. Koporintaan Pisompuruan minokinsian di kootusan Kuut Akawas om hal dilo’ kinongohon do Kuut Pokinsianan do wulan Kosiam 2023.
“Koporintaan Sabah do noondo aparagat momogusa’ kopotutan Sabah montok 40% dilo’ om mamaso sumodia’ montok kopogintongan kawagu kumointolu do 2026,” ka kawagu do kointalangan dilo’.
