Hajiji (wanan) tuminabi’ di Kumoduo Boyoon Montiri II, Datuk Seri Dr. Joachim Gunsalam pogulu nokotimpuun mitingan DUN Sabah di tadau baino’.
KOTA KINABALU: Koporintaan Pogun pinapaatag mooi do Koporintaan Pisompuruan monimbang mooi do poruntukan Pisompuuran anau papatahak kumaa iso’ Akaun Amanah montok papatantu’ poruntukan dilo’ amu’ katalib timpu nung amu’ oguno id toun maso-maso, ka di Boyoon Montiri, Datuk Seri Hajiji Haji Noor.
Koporintaan Pogun miontong-ontong mooi do poruntukan id Akaun Amanah dilo’ oguno miampai poinsonong tumanud tuduan kinapanahakan poruntukan dilo’, ka disio kawagu.
Tumanud di Boyoon Montiri, Sabah nonuan soginumu’ RM5.709 bilion id siriba’ poruntukan kopotundaan mantad Koporintaan Pisompuruan.
Ka disio, mantad ginumu’ dilo’, soginumu RM4.457 bilion nakabalanja’, naamot soginumu’ RM1.252 bilion amu’ noguno sasabab no do kobolingkahangan kopoindalanan miagal diti posusuhut:
1) Hal kuntiriktor – Kuntiriktor sinili aiso’ kosukupan kousinan toi kredit kousinan; Ginoris karaja’; om Kolomogon id kopoindalanan projik.
2) Hal Utiliti – Koloidan dokumentasi monotk pongoputan utiliti; Koloidan/kobolingkahangan birokrasi komponi utiliti; om Pemetaan utiliti (utility mapping) id tana’ (sub-terranean) om id siriba’ rinantai (sub-surface) alaid otunudan.
3) Hal tana’ – Kopongonuan kawagu tana’ di noinggangahan; Kagagaan mantad sanganu tana’ id doros kinoiyonon atag montok kopotundaan/kogunaan noilaan amu’ kosudong; Koyuon topografi di osusa’; om Koiyonon/wayaan sumuang kumaa koiyonon aiso’ toi haro kaantob.
4) Hal koponguludan – Ponuhuan moningkod karaja’ (stop work order) di Upisor Monguasa’; Kosusaon maganu sitok babarang pomonsoi; om Gatang kobuburuon id pidagangan koinsawat.
5) Hal Kotinanan popoindalan – Koloidan mogintong nogi’ popolulus Variation Order (VO); Koloidan bayaran kumaa momorunding/kuntiriktor om mangangaba’; Koloidan mogintong om popolulus kopongoputan timpu toi Extension of Time (EOT).
“Koporintaan Pogun toririmo maganu laang di otimpas id kopoibahan tongo’ hal ngaawi’ dilo’. Wookon nopo nga’, miampai papatantu’ koonuankopoindalanan toisoiso’ projik di nupalai montok kopoindalanan nopon ga’ akawas di toun maso-maso om toun-toun posusuhut dilo’,” ka disio ontok minonimbar ponguhotan di Datuk Darell Leiking (Moyog) id pitimungan Lintuhun Undangan Pogun (DUN) Sabah, do hiti baino’.
Darell minuhot laang ngaawi’ i nanu do Koporintaan Pogun Sabah id kopotontuan poruntukan mantad koporintaan Pisompuruan oguno miampai poinponu’ sabba no do poruntukan di pinoguli’ di toun 2022 nopo nga’ agayo kopio.
Boyoon Montiri minoboros, Koporintaan Pogun nga’ papatantu’ nogi’ oinsanan upalai projik mantad Koporintaan Pisompuruan kiguno maganu kookunan mantad Koporintaan Pogun lobi pogulu, miagal di poinsuang id “Garis Panduan Penyediaan Kajian Separuh Penggal Rancangan Malaysia Ke-12 (KSP RMK12)” om Upalai Projik Kopotundaan Toun 2024-2025 Sakadaion Pisompuruan.
Iti nopo montok papatantu’ palan nopo nga’ tumanud kogunaan pogun om kopoindalanan projik opongo id timpu di pinatantu’, ka disio pinopointalang.
“Montok papatantu’ kopoindalanan tongo’ projik kopotundaan Pisompuruan koindalan miagal di napalan, inggisaman kopiantangan poindalanon miampai po’ompus do Koporintaan Pogun miampai ponguhupan Upis Kopotundaan Pogun Sabah (SDO). Wookon dilo’ maya’ Mitingan Kounsol Karaja’ Kopotundaan Pogun (MTPNg) sabah i kitonggungan id kapanamangan om mogiboboros di hal ngaawi’ kopoindalanan projik kopotundaan Pisompuruan id pogun Sabah.
“Suai ko ilo’, Puruankuasa’ Karaja’ Kopotundaan Pogun (JTPNg) Sabah nga’ tinuridong montok papatantu’ kootusan mitingan MTPNg koindalan poinponu’ id nayatan pogun,” ka id Hajiji.
Suai ko ilo’, ka disio, kapagarasan Koupisan Karaja’ Agayo (JKR) Sabah maya’ kopongokunan koupisan dilo’ sabaagi Koupisan Teknik id siriba’ Ponuhuan Perbendaharaan (AP 182) do Koporintaan Pisompuruan nogi’ kopomoruhangan tongo’ upisor teknikal wagu nga’ wookon nogi’ inggisaman oponsol id koponguhupan Koporintaan Pogun do mamalan om popoindalan projik kopotundaan pogun miampai lobi kosonong.
