Hajiji (poindikau, tanga) miampai nuludan Kabinet Pogun di wagu pogulu nokotimpuun mitingan.
Hajiji minonorikohon mitingan Kabinet Pogun id Menara Kinabalu di tadau baino’
KOTA KINABALU: Boyoon Montiri, Datuk Seri Hajiji Haji Nor minonorikohon mitingan kumoinsan Kabinet Pogun id Merana Kinabalu do hiti di tadau baino’ katalib pinongunggaran i nokopokito kinoposilihan tolu montiri wagu om pinialanan portfolio di pipiro montiri.
Montiri wagu – Datuk James Ratib (Kopotundaan Mogigiyon om Kasasanangan Mogigiyon), Datuk Christina Liew (Ponombuluyan, Koubasanan om Sandad Posorili’) om i Phoong Jin Zhe (Kopotundaan Pomorunan) – tuminaru di ko 11tw Koiso’.
Datuk Ir Shahelmey Yahya tuminindapou mitingan dilo’ montok kumoinsan sabaagi Kumoduo Boyoon Montiri III i mongigit portfolio Montiri Karaja Agayo.
Boyoon Montiri nga’ minongunsikou nogi’ do kinogulian di Montiri Kopotundaan Labus Kakadayan, Datuk Jahid Jahim i suminuti’ sumakit pointonod toun di nakatalib.
Montiri suai i nokotindapou po nopo nga’ ii Kumoduo Boyoon Montiri I Datuk Seri Dr. Jeffrey Kitingan (Pomutanaman om Ponginsadaan), Kumoduo Boyoon Montiri II Datuk Seri Dr. Joachim Gunsalam (Koporintaan Koiyonon om Pomuwalaian), Montiri Kousinan Datuk Seri Masidi Manjun, Montiri Sains, Tiknologi om Inovasi i Datuk Mohd Arifin Arif om i Montiri Komulakan om Spoot, Datuk Ellron Angin.
Nokotindapou nogi’ i Monunurat Koporintaan Pogun, Datuk Seri Sr Safar Untong..
