Masidi (gibang) om i Shahelmey (tanga’) miniboboros ontok kinotombuluyan dilo’.
KOTA KINABALU: Montiri Kousinan Datuk Seri Masidi Manjun minaramit kotombuluyan apantang di Kumoduo Boyoon Montiri III po nogi’ Montiri Karaja’ Agayo Datuk Ir Shahelmey Yahya doid upis disio id Menara Kinabalu do hiti, di konihab’.
Id pinirubaan dilo’, io’ Masidi di Shahelmey miniboros di pipiro hal kapaampai do mogigiyon kaampai no i kopohompit do kapanamangan om koponginsonongan talun-alun om nogi’ kapangabaan waig.
Ka di Masidi hal ngaawi’ i kapanahak waya’ mitilombus kumaa mogigiyon miagal do kapanamangan talun-alun om koponginsonongan nogi’ kapangabaan waig mositi’ tompuanon do osikap om amu’ toguangon poinggaan toi kotoguang do koponginloidan di amu’ apatut.
“Unsubon ku o koupisan om kotinanan kitonggungan montok kapanamangan om kopongundaran nunu-nunu kogogonopan ginumuan om infrastruktur miagal do talun-alun om waig do mogintong di siktor swasta soira’ diolo’ popoindalan karaja’,” ka disio.
