Hajiji Haji Noor
KOTA KINABALU: Boyoon Montiri (KM), Datuk Seri Hajiji Haji Noor minoboros kopongunggaran Kabinet nopo nga’ hal i kiguno om kituduan monginggirot po do koporintaan pogun noondo diti.
“Montok dilo, momoguno tokou iso tiim di agaras.
“Kopuriman kogunoon montok monuridong iso pomorintaan ‘inklusif’ (kopotonggoi ngaawi), pinosuang ku Puru Lintuhun Koundangan Pogun (ADUN) mantad Pakatan Harapan (PH) suminuang id Kabinet, sabaagi pomoruhang suai ko’ mantad UMNO/BN om GRS.
“Oponsol montok koporintaan Pogun i buruanon ku kapanau sabaagi iso tiim di ogirot osompuru, miampai mi’ilang angkab di miagal i tinuridong mimpau kotumbayaan om sopipantang,” ka disio id iso kointalangan di tadau baino.
NULUDAN MONTIRI KABINET POGUN SABAH
Hajiji minoboros, Koporintaan Pogun kiangkab montok sumanganu lansanon i kihato inggisaman di mihunung om mongunsikoi tikid kogunoon montok papatantu inggisaman popoburu pogun koindalan oturundus om aiso nunu-nunu kopomigangahan miagal di an-imanon do rayat.
“Ginirot pulitik nopo nga oponsol montok mamagampot rikoton diti.
“Miampai iso tiim di ogirot, kapatantu yahai kopoopuan dinamik Koporintaan Pogun aanu monilombus, potilombus dino mongingkawas kotumbayaan papaapu’ suai ko’ kopongimbayat lobi kogumu po montok rumikot mangapu’ kumaa Sabah.
“Kiguno tokou papatantu kopoindalan kopotundaan tokou kotilombus koburu’ om potombus dino koponuluk di tongo’ batos pomikian agayo tokou kuminaa rayat om pogun,” ka di Hajiji po nogi Ponorikohon GRS.
