Jamawi (koduo, wanan), Riduan (gibang) om i Alexander (tanga) minokinongou kopointalangan mantad sanganu Naluyan Lodge om Tenom Coffee Villa, Gerald Baxter.
TENOM: Montiri Pomutanaman, Ponginsadaan om Pomorunan Akanon po nogi’ Puru Lintuhun Undangan Pogun (ADUN) Melalap, Datuk Jamawi Jaafar tuminindapou Mitingan Ponguludan Puruankuasa’ Karaja’ Toun Tumombului Watas Tenom (MDT) 2026 kopihondot Toun Tumombului Malaysia (TML), id Pisuk Mitingan Padas, do hiti di tadau baino’.
Jamawi minokinongou kopointalangan mantad tongo’ luguan koupisan, naamot mitingan pinonorikohon di Upisor Watas Tenom, Alexander Liew.
Ka disio, mitingan dilo’ kituduan miboros sondikoton ponombuluyan watas nogi’ mamalan ponuang ababayan kopihondot Toun Tumombului Tenom.
Jamawi (kolimo, wanan) minamaramit tandamato mantad di Yong.
Wookon ababayan di pinalan nopo Pesta Bot Naga, Pesta Kopi Tenom Sabah, Pesta Koubasanan Poonsokid Sawat, Pesta Kalimaran, Ababayan Hiking Tenom 2026 om Tenom Campfest 2026.
Minoboros isio, mogisusuai kaparagatan maan poindalano’ montok mongimbayat korikotan tutumombului suai ko’ popointutun produk om timbayat ponombuluyan haro mantad id Tenom.
Minonongkounsikou i Jamawi om minanangkabayahan kumaa koinsanai puru puruankuasa i poinhompit, suai ko’ pinopolombus sokodung poinponu’ kohondot koinsanai ababayan di pinalan.
Nokotindapou nogi’, Puru Parlimen Tenom, Datuk Riduan Rubin; tongo’ luguan koupisan om mobi’ pipiro kotinanan koporintaan om swasta.
“Kalansanan koinsanai inggisaman popointutun Tenom sabaagi koiyonon rikoton do timpu dumontol oinsanangan,” ka disio.
Id ababayan sopisuai, i Jamawi ruminuba’ di tongo’ puru Lintuhun Pongindopuan Cina Tenom i binuruan di Ponorikohon dilo’, Datuk Yong Oi Kiong doid Restoran Tenom Coffee Villa.
