Hajiji miampai di Anifah om naalap suai guminambar miampai rayat Bongawan i tuminindapou Ramai Sopisuau id Lintuhun Mogigiyon Bongawan, di tadau baino’.
BONGAWAN: Boyoon Montiri, Datuk Seri Haji Hajiji Haji Noor pinoposotol do piuhupan ogirot pialatan koporintaan pogun om koporintaan Pisompuruan oponsol kopio montok papatantu’ pomorintaan pomogunon kapanau oturundus nogi’ koburuon Sabah kotilombus kosiau miampai poinpuli.
“Piuhupan miampai Kuala Lumpur oponsol kopio tu’ momorinta’ yolo do pomogunon, om pomogunon diti nopo nga’ pomogunon tokou. Poingkuro po, soira’ dati’ momusus kopotutan pogun, mositi’ tokou nogi’ momusus pomogunon,” ka disio ontok minoboros id Ramai Sopisuau Boyoon Montiri miampai Rayat Bongawan id Lintuhun Mogisuaiguno Bongawan, do hiti, di tadau baino’.
Hajiji pinapabanta do somok sitanga’ riong tanak Sabah nakaramit koundaran mantad kopoobian balajaran kiginumu RM1.3 bilion id timpu apat toun nakatalib.
Ka disio, ginumu’ nopo dilo’ nga’ i bobos agayo nung piadangon pomorintaan nokopogulu asil kinalantaion koporintaan pogun minomorinta’ miampai opulokis nogi’ minongingkawas nopuhu asil pogun.
“Id kaganaan balajaran, soginumu’ RM1.3 bilion pinabalanja id simpu apat toun sitanga’ diti montok monguhup kikiro 500,000 tanak Sabah.
“Pogulu, sikulasip RM4 riong gisom RM50 riong no do sontoun, nga’ noondo pinopolulus tokou RM145 riong. Kinoingkawason diti naantakan tu’ nakalantoi tokou minomorinta’ miampai osonong om minongingkawas asil pogun,” ka disio.
Minoboros isio, asil pogun i pogulu diti kikiro RM4 bilion gisom RM5 bilion sontoun noondo nokoinsawat kuminaa RM7.5 bilion, om asil dilo’ pinoguli’ kawagu kumaa rayat maya’ mogisusuai koyuon ponguhupan om kaparagatan koburuon.
Hajiji minambala’ nogi’ totondos pembangkang i mongomi koporintaan pogun mimpomonsoi nopo kapahabaran nga’ aiso’ asil nopurimanan rayat.
“Mimang no do amu’ yolo’ kopuriman, sabab koundaran dilo’ nakaramit do rayat. Sundung pia okon ko’ koinsanai aanu monguhup, nga’ i kapamaramit koundaran nopo nga’ bobos ogumu’.
“Rugi nung Gabungan Rakyat Sabah (GRS) amu’ pamanangon. Mositi’ tokou misompuru do papatantu’ timpu dumontol Sabah, kada’ kobingampawong di pagkakaa pembangkang,” ka disio.
Komoyon nogi’ disio gaya pulitik pembangkang sabaagi noponu’ boros kusung.
“Mimboros yolo’ do magapui-aopui miagal padagang tubat – manau-panau, murug-turug – nga’ tubat dilo’ amu’ kolingos tomporuruol rayat i momoguno kopongobian koporintaan,” ka disio monindir.
Id ramai di miagal, Hajiji po nogi’ Ponorikohon GRS pinahabar di Presiden Parti Cinta Sabah (PCS), Tan Sri Anifah Aman sabaagi calun GRS montok timpohon Lintuhun Undangan Pogun (DUN) Bongawan id PRU Sabh Ko-17.
“Nung GRS om parti komponen dau kiharo kukumaraja’ ogoris, osubuanan sokodung rayat i misompuru, otumbayaan oku do Bongawan diti pasanganu GRS om kalantoi tokou,” ka disio.
Pinopolombus nogi’ isio angkab mooi do DUN Bongawan i baino’ diti obian do parti pembangkang koguli’ id siriba’ koporintaan mooi do watas dilo’ aanu popomogot, kopiongoi di slogan ‘Bongawan Maju’.
Suai dilo’, Hajiji pinopoboros nogi’ kotumbayaan do GRS kaanu gumuli’ monuridong koporintaan katalib PRU Sabah do ko 29tw Kohopod om Iso’ diti.
“Nung koguli’ tokou monuridong koporintaan, lobi kogumu’ ababayan ikonomi maan palano’ montok rayat id timpu limo toun dumontol,” ka disio.
Kohondot dilo’, pinoposorou isio do rayat mooi do amu’ aampawong di pagkakaa, totondos om pongungudut pembangkang i kituduan nopo momidsala’ kotumbayaan rayat kumaa koporintaan.
