KOTA KINABALU: Parti Bersatu Sabah (PBS) pinopolombus sokodung poinponu’ om poungkakat ogirot miampai Kounsol Presiden Gabungan Rakyat Sabah (GRS) id kopomususan kopotutan koundangan Sabah kohondot 40 pihatus asil opulang Pisompuruan, i komoyon sabaagi haal bantug om tinonggungan pomogunon.
Monunurat Agayo PBS, Datuk Julita Majungki minoboros, kootusan Kuut Akawas di kaawagu diti i pinopoimagon kopotutan Sabah kumaa geran pinotomod 40 pihatus id siriba’ Perkara 112C om 112D Koundangan Pisompuruan monginggirot ningkakaton i alaid no do pininggisaman do PBS, do kopotutan dilo’ okon ko’ pogkulisi, nga’ kopotutan koundangan i nosili nimpohon kumaa pinonuridongan Pisompuruan Malaysia.
“PBS mintong haal diti okon ko’ mantad sunduk koponsolon pulitik, nga’ sabaagi haal ginirot tinonggungan nasional om pamantangan kumaa Koundangan,” ka disio id kointalangan di tadau baino’.
Julita Majungki
Julita minoboros, kopoobian 40 pihatus diti nopo nga’ somboogian mantad pinirotian olidang i minogowit Sabah suminompuru Pisompuruan Malaysia maya’ Pibatosan Malaysia 1963 (MA63).
“Mamantang tonggungan diti kirati mamantang sunduan otopot Malaysia.”
Minoboros isio, nunu-nunu inggisaman montok magada’ toi mokinsian kohondot kootusan dilo’ kopomidsala’ kotumbayaan om pirotian i nosili kagos pialatan koporintaan Pisompuruan om pogun.
Minamarayou nogi’ isio kopomuruanan okodou di Boyoon Montiri, Datuk Seri Haji Hajiji Haji Noor, i osikap minonuhu’ kotinanan poinggompit pogun, kaampai Komontirian Kousinan, Unit Mamalan Ikonomi (EPU) om Koupisan Luyar Agayo Pogun, do monorisid pinomohokiman dilo’ om sumoosodia’ montok pibabarasan kirati miampai koporintaan Pisompuruan.
“Laang osikap diti kopokito tonggungan ouli’ do koporintaan GRS montok monigampot kopogintangan di aadang, otopot om otulid kopiongoi di Koundangan Pisompuruan,” ka disio.
Pinopolombus nogi’ i Julita pongunsikohan kumaa di Luguan Montiri, Datuk Seri Anwar Ibrahim mantad kinoukabon om ponginsomokan poinpuli disio id kopohompitan Sabah om Sarawak.
“Otumbayaan yahai kopomuruanan di Luguan Montiri manahak kosiwatan osonong montok mamalan kawagu piromutan Pisompuruan-Pogun mimpau do pipantangan om kinotulidon,” ka disio.
“Kohondot dilo’, PBS monokodung pongunsuban Kounsol Presiden PBS mooi do koporintaan Pisompuruan amu’ mokinsian kootusan Kuut Akawas, nga’ mamaramit dilo’ sabaagi timpu popiiso’ om piuludan.”
Pinosotol di Julita tonggungan poinponu’ PBS kohondot misi koporintaan GRS montok monugat koinsanai kopotutan om koundaran id siriba’ Koundangan Pisompuruan nogi’ MA63, miampai pinoposotol do kopoburuan diti okon ko’ mimpau do pigogutan, nga’ kotumbayaan.
“Kaadangon montok Sabah amu’ kopolomog do Malaysia, tu’ koponginggirot nogi’. Soira’ Sabah koburu’, Malaysia nga’ asanang. Soira’ kaadangon poudongon, pisompuruan nasional nga’ koinggirot,” ka disio.
Minoboros nogi’ isio, timpu diti nuru’ silihon titik kosimbanon honombo do goduduo koporintaan, Pisompuruan om pogun, momili’ “kaadangon ko’ mantad do koloidon, om piuhupan ko’ mantad pulitik”.
“Mamantang kopotutan 40 pihatus okon i ko’ iso’ laang pinuahang ginawo… ilo’ nopo nga’ koponulukan batos Malaysia,” ka disio pinoposotol.
“Miampai popowonsoi dilo’, i Luguan Montiri om pomorintaan dau katanom id ginawo tikid rayat Sabah sabaagi lansanon i popoudong kaadangon, mononduli’ bantug om poposindak kawagu kotumbayaan kumaa imanon Malaysia.”
