Hajiji minonorikohon Mitingan Kounsol Presiden GRS id Seri Gaya di tadau baino’.
KOTA KINABALU: Kounsol Presiden Gabungan Rakyat Sabah (GRS) insan po pinoposotol do kopotutan 40 pihatus Sabah nopo nga’ kopotutan perlembagaan (koundangan) i mositi’ pantangon poinponu’ do koporintaan Pisompuruan.
Id iso’ kopointalangan pinalabus katalib Mitingan Kounsol Presiden GRS id Seri Gaya do hiti di tadau baino’, piomungan dilo’ minoboros, maganu ilo’ do koilaan padaahan pinomohokiman i pinatahak do kuut kohondot kootusan Kuut Akawas di ko 17tw Kohopod katatalib i pinopoimagon do kopotutan koundangan Sabah kumaa geran pinotomod 40 pihatus montok timpu 1974 gisom 2021.
“Haal diti okon i ko’ kopohompit undang-undang nopo – karait ilo’ do haal bantug koundangan. Artikel 112C om 112D Koundangan Pisompuruan miampai Pibatosan Malaysia 1963 (MA63) nopo nga’ impohon agayo kumaa piokunan Sabah id pinonuridongan Malaysia,” ka do kounsol dilo.
Kounsol dilo minoboros, pomohokiman dilo’ kapanahak no do waya’ kumaa nunu i poinsurat om nopiokunan mantad kolimpuunon, miampai minongunsub di Luguan Montiri, Datuk Seri Anwar Ibrahim om koporintaan Pisompuruan do amu’ papafail pokinsianan kohondot kootusan dilo’.
“Kuut amu’ minongontok nunu-nunu penalti kousinan – minonuhu nopo pogintangan koundangan di alaid no noundorongan poindalanon tumanud Artikel 112C om 112D. Montok momonsoi kopokisianan kirati magada’ proses pirundingan dilo’ sondiri, okon ko’ kootusan dilo’,” ka disio.
Nosusuhut kootusan Kuut Akawas dilo, Boyoon Montiri Datuk Seri Haji Hajiji Haji Noor minonuhu’ Komontirian Kousinan Sabah, Unit Mamalan Ikonomi Pogun (UPEN) om Koupisan Luyar Agayo Pogun do monorisid miampai poinralom padaahan pinomohokiman dilo.
“Koporintaan pogun poinsodia’ om pointopot montok papaharo pibabarasan kirati miampai koporintaan Pisompuruan kopiongoi di ponuhuan kuut montok popoindalan pogintangan om popoimagon pibatosan karait nunu i apatut nosili kopotutan Sabah,” ka disio.
Kounsol dilo’ pinoposotol do adalaan no kalaid rayat Sabah – mantad Pitas gisom Pensiangan – poinsaan koinggoritan gama-gama’ amu’ kopiadangan om kinoloidon minonumboyo’ kopotutan di pinajamin.
“Soira’ nopisok sumbu id pisuk darjah songulun tanak, soira’ songulun tina’ asansagan mintana’ bojaam-jaam montok kumaa hospital, soira’ sukod wagu tokou sumompogunan tu’ aiso’ timpu dumontol do hiti – ilo’ okon ko’ numbur nopo. Ilo’ no waya’ otopot hinapadan toun do amu’ kopiadangan,” ka disio.
Sundung ingkaa, kounsol dilo’ pinoposotol do Sabah tumilombus popokito kopurimanan mamantang om piuhupan miampai di Luugan Montiri id siriba’ kopomuruanan di Hajiji.
“Sabah toririmo monilombus piromutan karaja’ di osonong om sopipantang miampai Putrajaya. Ogirot yahai poungkakat monokodung poinponu’ di Luguan Montiri. Sabaagi rayat Malaysia, oondos yahai di kopomuruanan disio i kitonggungan om pinoposimbuat ngaran pomogunon id nayatan pomogunan,” ka do kounsol dilo’.
Kounsol dilo’ pinopolombus nogi’ do maya’ ponginsomokan poinpuli om poingukab di Luguan Montiri, koporintaan GRS nakaanu 13 mantad 29 ponugatan MA63 mantad koporintaan Pisompuruan.
Pinoposotol ningkakaton GRS id “pogihuman ouli’ om aiso’ komporomi” kohondot kopotutan koundangan Sabah, kointalangan dilo’ minongoput do piomungan dilo’ tumilombus mongobi’ di lobi tolu riong rayat Sabah montok papatantu’ oinsanan koundaran id siriba’ Koundangan Pisompuruan om MA63 koindalan poinponu’.
“Kalantaion diti okon ko’ numbur nopo id bolikan piadasan. Ilo’ kopohompit do mononduli’ kotumbayaan kumaa kaadangon montok tikid rayat Sabah i alaid no sinuhu’ mogindad – toun kumaa toun – montok maganu kogugunoon kolimpuunon i nopurimanan do rayat Malaysia suai solinaid hinapadan toun,” ka disio.
“Ilo’ kokomoi do aiso’ kampung i kotilombus otuong, aiso’ sikul i aiso’ kogogonopan nogonop, om aiso’ mogigiyon i noiduanan mantad nopo do kousinan i apatut daa nosili kopotutan Sabah amu’ insan korikot.”
Kounsol dilo’ pinoposotol do sugaton Sabah okon i ko’ kopokionuan, nga’ kopotutan – iso tonggungan koundangan i kosoribau koporintaan om penggal pulitik.
“Popoudong dilo’ kopokito d Malaysia poinporinta’ mimpau undang-undang om angkab osonong, okon ko’ mantad kosisimbayanan,” ka do kointalangan dilo’.
Kounsol Presiden GRS minongunsub nogi’ koporintaan Pisompuruan do maganu kosiwatan diti montok momolingos suhat gama-gama’ hinapadan toun kinopologosan kumaa Sabah.
“Pologoson iti kosili timpu hinombo koporintaan Pisompuruan okon nopo ko’ monumboyo tongo’ nangabatos, nga nogi’ tumilombus momolingos kopurimanan nokoindisan i nopurimanan rayat Sabah solinaid diit. Luguan Montiri hondomon do oinsanan rayat Sabah om Malaysia sabaagi songulun lansanon i ototopot momoduli’,” ka disio.
