Hajiji ruminamit tandamato mantad di Adzman.
KOTA KINABALU: Suruhanjaya Surupukaraja’ Balajaran (SPP) pinopo’iyon soginumu’ 1,000 mongingia’ wagu id sikul ngaawi’ doid Sabah po’ompus toun 2025, kopohompit 315 mongingia’ sikul osiriba’ om 685 mongingia’ sikul mananga’.
Ponorikohon dilo’, Dato’ Haji Adzman Talib, minoboros kinopoiyanan nopo dilo’ nga’ wookon mantad kopomogunaan 21,348 Upisor Surupukaraja’ Balajaran (PPP) id pototongkop pomogunon miagal pinatantu’ Komontirian Balajaran Malaysia (KPM).
“Gisom ko 30tw Koonom 2025, rontob pinonuangan karaja’ mongingia’ id Sabah nokosigampot 97.78 pihatus, miampai 44,058 mongingia’ noko’iyon nung paagalon di 45,057 karaja’ i pinolulus id 1,298 sikul siriba’ KPM,” ka disio ontok minanahak kopointalangan kumaa di Boyoon Montiri, Datuk Seri Haji Hajiji Haji Noor id kinotombuluyan apantang doid Menara Kinabalu, do hiti, konihab.
Adzman minoboros, sundung rontob koponuangan modingkoponu’, sikul ngaawi’ id Sabah kakal potoguang kokurion mongingia’ om inggisaman po’ompus masaan poindalanon montok mangalit pialatan dilo’.
Ka disio, wookon kaantaban agayo surupukaraja’ balajaran nopo nga’ kinoingkawason ginumu’ mongingia’ minomili’ do pinsin osopung. Di 2024, soginumu’ 112,607 mongingia’ id pototongkod pomogunon pinsin osopung nung piadangon di 13,192 tulun di 2023. Id Sabah nopo, kiginumu’ 947 kes nokosurat di 2024 nung piadangon di 813 ontok toun pogulu dilo’.
Ka wagu disio, haal winagat karaja’ kopoindalanan om koponugatan ‘digitalisasi’ di misimbou noilaan do wookon intodonon mongingia’ minongiduan profesion lobi osopung.
“SPP masaan miuhup miampai KPM montok monorisid panalasaian poinpuli montok papatantu’ kinogiroton ginoris monunuduk id sikul,” ka disio.
Daamot dilo’, minamarayou i Adzman inggisaman koporintaan pogun id siriba’ pomuruanan di Hajiji id kinopoinggirotan bantug balajaran maya’ mogisusuai inggisaman nogi’ sokodung kumaa sikul om susumikul id Sabah.
Naamot dilo’, i Hajiji pinopolombus kopongunsikohan kumaa tonggungan SPP id kopotontuan koposilihan mongingia’ di kitonggungan montok momogonop kopomogunaan balajaran pomogunon.
Kinotombuluyan apantang dilo’ notindapou nogi’ di Puru SPP mantad Sabah, Datin Seri Panglima Datuk Dr. Hajah Nuinda Haji Alias; Monunurat SPP, Md. Radzi Hassim; om i Monunurat Bohogian Urusetia Raan Sabah, Intan Zainab Mohd. Bustan.
Id ababayan sopisuai, Boyoon Montiri nonuan pokikitanan inovasi balajaran digital mimpau kinomiloon winonsoi (AI) di Potunud Samasama Works Sdn. Bhd., Albert Yek.
Ka id Albert, piuhupan miampai Koupisan Balajaran Sabah dilo’ kihontolon popointutun kakamot pinsingilaan digital kikuasa’ AI kumaa sikul ngaawi’ doid pototongkop pogun, miampai 100 unit osopung maan poikido’.
Nokotindapou nogi’ i Montiri Sains, Tiknologi om Inovasi Sabah, Datuk Dr. Mohd. Arifin Mohd. Arif; Potunud Balajaran Pogun Datuk Raisin Saidin, nogi’ upisor totuo mantad pipiro koupisan poinhompit.
