Kadzim (gibang) minamaramit watikah kinoposilihan i pinotunui di Tun Musa.
KOTA KINABALU: Datuk Seri Kadzim M. Yahya sinili kawagu sabaagi Speaker Lintuhun Undangan Pogun (DUN) Sabah montok timpu limo toun mimpuun ko 1tw Kohopod 2025.
Istiadan tuminaru di Kadzim dilo’ nokoindalan id toguang di Molohingon Agayo Pogun Sabah, Tun Musa Aman kikiro jaam ko 10.45 kosuabon tadau Kaapat.
Kopupusai ilo’, i Kadzim suminain watikah kinoposilihan i sinasi’ di Hakim Agayo Sabah Sarawak, Datuk Azizah Nawawi id Lintuhun Istiadat Istana Seri Kinabalu.
Nokotindapou nogi’ i Boyoon Montiri Sabah, Datuk Seri Haji Hajiji Noor om sawo, Datin Seri Juliah Salag om tongo’ Kumoduo Boyoon Montiri, Datuk Seri Dr. Joachim Gunsalam om Datuk Ir. Shahelmey Yahya.
Nokotindapou po nogi’ id istiadat dilo’ i Montiri Sains, Tiknologi om Inovasi, Datuk Dr. Mohd. Arifin Mohd. Arif; Montiri Ponombuluyan, Koubasanan om Sandad Posorili’, Datuk Seri Panglima Christina Liew; Montiri Koburuon Mogigiyon om Kasasanangan Rayat, Datuk James Ratib; Montiri Koburuon Labus Kakadayan Datuk Seri Panglima Jahid Jahim; Monguhup Montiri (Haal Ugama’) Datuk Ruslan Muharam om Mufti Koporintaan Pogun Sabah, Datuk Bungsu @ Aziz Jaafar.
Kumoinsan di Kadzim sinili sabaagi Speaker DUN Sabah di ko 1tw Kohopod 2020.
I Kadzim nopo nga’ graduan Diploma Pentadbiran Awam (UiTM) Shah Alam pogulu minongoput pinsingilaan id Bachelor of Law (LLB) Council for National Academic Awards (CNAA) id United Kingdom om potilombus dino Certificate Legal Practice (CLP) Malaysian Qualifying Board.
Karier disio nokotimpuun sabaagi Upisor Karaja’, Bohogian Pintoriningan om Kerjaya id Koupisan Boyoon Montiri di toun 1981, sinusuhut do Monguhup Undang-Undang id Tetuan Ghani & Co. (1986-1987), talib dilo’ kuminaraja’ sabaagi Upisor Undang-undang Ko-Nelayan (1987-1990), Monunurat Eksekutif UMNO Sabah (1991-2020) om Ponorikohon Kotinanan Dodopiton Sabah (2008-208).
