Hajiji ‘turun padang’ minooi intong karaja’ ngaawi’ koponginsonongan ralan i naraag gama-gama’ tana’ notuhan id wawaya’an Penampang-Tambunan doid Kampung Pogunon, Penampang di tadau baino’.
PENAMPANG: Boyoon Montiri, Datuk Seri Haji Hajiji Haji Noor minonuhu’ karaja’ ngaawi’ ponginsonongan ralan i noinraagan gama-gama’ tana’ notuhan id wawaya’an Penampang – Tambunan insinkapan montok mamajamin koumoligan tongo’ moomoguno om koturunduson piromutan kumaa koiyonon poonsokid.
“Koporintaan pogun manahak koposuulan kumaa koumoligan rayat. Mokianu tokou karaja’ ngaawi’ ponginsonongan diti pongohon osikap mooi do mogigiyon amu’ kotilombus oinggorit,” ka disio katalib minooi intong kinoiyonon kinaantakan id Kampung Pogunon, do hiti, di tadau baino’.
Id kinorikotan mantad Kuching katalib tuminindapou Mitingan Puruankuasa’ Teknikal MA63 miampai di Luguan Montiri om Premier Sarawak, pinolombusan di Hajiji kuminaa kinoiyonon tana’ notuhan miampai di Kumoduo Boyoon Montiri III po nogi’ Montiri Karaja’ Agayo, Datuk Ir. Shahelmey Yahya; Montiri Koburuon Mongindapu’ om Koperasi i po nogi’ Puru Parlimen Penampang, Datuk Ewon Benedick; ADUN Kapayan, Datuk Jannie Lasimbang; nogi’ Luguan Bohogian Gagasan Rakyat Moyog, Datuk Ceaser Mandela Malakun montok maganu kokiikitanai atalang kohondot di karaja’ ngaawi’ ponginsonongan i masaan poindalanon.
I Hajiji minonuhu’ Koupisan Karaja’ Agayo (JKR) Sabah, komponi konsesi nogi’ kotinanan poinggompit do momoruhang misin om kumaraja’ 24 jaam montok papatantu’ wawaya’an misulak oukaban kawagu id timpu oruhai.
“Kikosiwatan oku minooi intong talun-alun di notuhan mantad nulu ponong hilo’. Mantad dilo’ pokionuon bohogian JKR om nogi’ komponi konsesi i monginsonong ralan diti do maganu laang osikap. Om manahak tokou jominan id suang timpu iso’ toi duo tadau diti kopomongo yolo’ do wawaya’an misulak dilo’.
“Do noondo aanu do gunoon iso’ no koongoiyo’. Mantad dilo’, kumaraja’ yolo’ 24 jaam. Kalansanan tokou tongo’ moomoguno talun-alun toi ko’ rayat id koiyonon diti do tumootoboi po. Pologoson koporintaan maganu laang di bobos osonong,” ka disio pinopointalang.
Suai ko’ kobolingkahangan ralan, i Hajiji minoboros, piromutan lotirik di noputut gama-gama’ kinaantakan dilo’ nga’ nuru’ sikapon mononduli’.
“Naamot piromutan lotirik i noputut gama-gama’ dilo’, pokionuon tokou bohogian Sabah Electricity Sdn. Bhd. do maganu laang osikap nogi’ montok mongoput kapangabaan diti. Om yoho’ sondiri momoromut di CEO Sabah Electricity. Kalansanan tokou yolo’ do maganu laang osisikap id timpu oruhai diti,” ka disio.
Sinuhu’ po nogi’ disio Koupisan Waig Sabah om JETAMA papatantu’ pangaba’ waig oborisi’ otonduli’ miagal toririmo id koiyonon di noumpadanan.
Hajiji nonuan kopointalangan karait karaja’ kopongundaran ralan i naraag gama-gama’ tana’ notuhan id wawaya’an Penampang-Tambuna doid Kampung Pogunon, Penampang, di tadau baino’.
Kad isio, oinsanan inggisaman ponguhupan dilo’ uludon do Puruankuasa’ Ponguludan Kadaaton Pogun (JPBN) miampai kotinanan poinhompit kaampai Koupisan Kotundunan Mogigiyon montok papatahak ponguhupan apatut kumaa di nongogompitan.
Ponoriukan osopung nokoilo tana’ notuhan dilo’ mantad no do kinosopohon rasam po’ompus solinaid tolu tadau otuntud. Tumanud ruputan Koupisan Pomuwoigan om Poluyungan (JPS) maya’ laman ‘Public InfoBanjir’, kinatayadan rasam di akawas nokosurat soginumu’ 23.4 milimeter id suang timpu 15 minit om 82.5 milimeter id timpu sangadau di ko 11tw Kosiam katatalib. Koyuon dilo’ nokoowit koiyonon otungab id kinoiyonon dilo’ nosoguban gisom nokoowit kinotuhanon tagayo.
Daamot dilo’, pinopolombus nogi’ i Hajiji kotongoban om kolisihan kumaa paganakan nogompitan tana’ notuhan i nokoowit kinapataion soira’ songinan walai nountunan.
“Poporikot oku kolisihon om kopurimanan tumongob ku id koobian koporintaan kumaa paganakan i walai diolo’ nopuhut om haro i nountunan, noiduan ginawo. Tumongob tokou kopio tu’ iti nopo nga’ kadaaton di id labus kapanamangan tokou,” ka disio.
Hajiji minanahak jominan koporintaan pogun papatahak ponguhupan ‘ihsan khairat’ om sokodung montok monuridong kawagu iyon-iyonon paganakan di naraag.
“Koporintaan pogun opusou di konosipan paganakan nogompitan. Manahak oku jominan poguhupan osikap maan patahako’,” ka disio kawagu.
JKR Sabah pinopoilo gisom jaam ko 12 pitanga’ adau di baino’, pipiro kinoiyonon id Jalan R500 Kota Kinabalu – Keningau – Tenom kakal nopihanaan gama-gama’ liyud om tana’ notuhan, nga’ kogumuan wawaya’an aanu no do maya’ miampai kapanamangan iso’ waya’an naamot karaja’ kopumorisian masaan poindalan.
Naamot dilo’, tumanud ruputan Sekreatriat JPBN Sabah, gisom jaam ko 8 kosuabon baino’, soginumu’ 437 nogompitan mantad 128 paganakan kakal pinoiyon id limo longkod poundolihan naamot (PPS) id tolu watas ilo’ nopo nga’ Beaufort, Penampang om Tawau.
Id Beaufort, 154 nogompitan mantad 53 paganakan noondo pinoiyon id PPS Selagon. Naamot dilo’, id Penampang, soginumu’ 224 nogompitan mantad 64 paganakan pinoiyon id tolu PPS ilo’ nopo nga’ Kompleks Sipoot Penampang (39 tulun), SK St. Paul Kolopis (43 tulun) om Lintuhun Huguan Siou (142 tulun).
Id Tawau, 50 nogompitan mantad 11 paganakan pinoiyon id PPS Masjid Al-Aman katalib kadaaton kinotutudan.
Miampai oinsanan, 23 kampung noumpadanan, miampai nokosurat iso’ kinapataion gama-gama’ kadaaton.
