Hajiji miampai di Dr. Joachim om naalap suai pinopoindalan gimik sumungkad Kakadayan Wagu Seri Milian, Kota Kinabatangan.
KINABATANGAN: Watas Kinabatangan momoguno iso’ kosiwatan wagu koburuon montok rayat id koiyonon diti mamaramit lobi kogumu’ komogoton i owiton do koporintaan.
Boyoon Montiri (KM), Datuk Seri Haji Hajiji Haji Noor minoboros, mantad pogi dilo’, koporintaan Gabungan Rakyat Sabah (GRS) minamalan miampai pointalang koburuon montok Sabah, kaampai id watas diti.
Ka disio, pamalanan i winonsoi maya’ Sondikoton Sabah Maju Jaya (SMJ) dilo’ kopohompit oinsanan boogian miagal monimbuat ikonomi, balajaran om kasasanangan rayat.
“Mogisuaian po naangayan di naanu tokou, nga’ somoonu’ osuayan tokou tu’ haro wookon boogian i amu’ mangakun do nunu i pinoindalan koporintaan.
“Pasanganu tokou rikod monguhup rayat om monimbuat ikonomi rayat maya’ tolu kaganaan agayo ilo’ nopo nga’ pomorunan, ponombuluyan om pomutanaman,” ka disio id Ramai Sumungkad Kakadayan Wagu Seri Milian id Dataran Terminal Poingukab Kota Kinabatangan, do hiti, di tadau baino’.
Hajiji miampai Dr. Joachim, Kumoduo Potunud Koupisan Tana’ om Monukat Pogun, Alan Chua om naalap suai guminambar miampai mobi’ mogigiyon kampung i nakaramit geran tana’ PANTAS.
Hajiji minonugut pipiro rikod naangayan koporintaan buruanon disio noondo diti, kaampai pinopoburu’ ‘modal insan’, minanahak kasasanangan kumaa rayat nogi’ minomoruhang asil pogun maya’ tumau om gas.
Ka disio, asil dilo’ pinoguli’ kawagu kumaa rayat maya’ mogisusuai inggisaman miagal ponguhupan RM300 sombulan solinaid sontoun kumaa tinimungan mosikin om mosikin ‘tegar’ i nakapanahak koundaran kuminaa lobi 10,000 tulun.
Minoboros isio, ababayan Walai Mesra SMJ nga’ rinuhangan kuminaa 40 tinan id tikid kinoyonon Lintuhun Undangan Pogun (DUN) kaampai DUN Lamag om Sukau montok manahak kasasanangan kumaa rayat.
Id timpu miagal ka disio, kopoirntaan pogun maya’ Komontirian Koburuon Mogigiyon om Kasasanangan Rayat dilo’ pinopoikid nogi’ 100 misin dialisis id hospital om kolinik koporintaan pototongkop pogun montok manahak pongusapan aiso’ kabayar kumaa susumakit luluso.
“Nung roiton ku ngaawi pikikiro limo jaam amu’ aawi’, nga’ rikod inggisaman tokou 400 lobi id SMJ, gisom noondo 94 pihatus no nokoindalan, nga’ pembangkang mimpura-pura’ amu’ kokito,” ka disio.
Nosusuhut dilo’, Hajiji po nogi’ Ponorikohon GRS mokianu rayat id DUN Lamag om Sukau do momonsoi sumpili’ di kotondu’ id Pomilian Agayo Pogun Ko-17 (PRN17) obontol.
Ka disio, rayat id koiyonon diti nuru’ monimban konosipan diolo’ mooi amu’ oiduanan nung piadangon di watas suai.
“Parti koporintaan no i kaanu manahak kasasanangan om GRS no parti i nosili koporintaan do timpu diti. InsyaAllah koporintaan GRS pointatap kosili koporintaan solinaid iso’ penggal po katalib PRN obontol.
“I oponsol rayat tokou monokodung, momoguno pomusarahan montok momonsoi ponimbangan, kada’ kadala’ai otumbayaan media sosial i lobi kogumu’ totondos om tudut.
“Amu’ tokou manu mogigiyon tokou miagal dilo’, manu tokou mogigiyon tokou di ‘positif’, momonsoi karaja’ osonong montok mogihum kaakan-akano’ di lobi kosonong om manu komogoton tinan, paganakan nogi’ mogigiyon, okon totondos om mimpopol tikid tadau,” ka disio.
Naamot dilo’, karait projik Kakadayan Wagu Milian id Kota Kinabatangan, ka di Hajiji, kosili ilo’ do ‘game changer’ i koowit kosimbanon agayo id Kinabatangan id timpu limo gisom 10 toun dumontol.
Id haal suai, Hajiji i nuhot magaganu habar karait aal calun PRN17 minoboros, haal dilo’ potontuon parti soira’ orikot timpu dau.
“Nga’ noubasanan no pomilian agayo, tantu’ sopitanding-tanding. Sabah diti bobos ogumu’ parti id Malaysia, haro lobi 24 parti om romiton tokou demokrasi, isai i orohian monokitanding, tumanding,” ka disio.
Kopihondot ramai dilo’, Hajiji nga’ pinapatahak nogi’ 255 geran deraf PANTAS montok DUN Lamag kopohompit ginayo 585.425 hektar (1,439.21 ekar) kuminaa mogigiyon kampung, geran tana’ Kounsol Watas Kinabatangan kiginayo 157.48 ekar om tolu geran deraf PANTAS DUN Sukau miampai ginayo 16.224 hektar (40.09 ekar).
Nokotindapou nogi’, Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam om tongo’ lansanon suai.
