Dr. Jeffrey ontok rinubaan media.
KOTA KINABALU: Kapamaramaian Tadau Sabah 2025 kosili nimpohon oponsol id kopoinggirotan korotion susuyan kahandaman pogun Sabah.
Kumoduo Boyoon Montiri I, Datuk Seri Dr. Jeffrey G. Kitingan minoboros, kaparamaian do toun diti kopokito pokikitanan sinusuyan kahandaman, seminar om kogogonopan basaon pinotomod montok manahak kosiwatan kumaa tulun ginumuan mamarati pinamanahan Sabah kuminaa kinomordikaan.
“Toun diti, ababayan kapanau do ko 30 om 31tw Kowalu’ id Padang Merdeka, Kota Kinabalu.
“Pokikitanan toun diti lobi kogonop nung pitopongon pogulu diti hinombo do poposodia’ tokou tongo’ buuk, dokumen om kogogonopan ‘visual’ susuyan kahandaman mooi do mogigiyon, kosuul no sukod wagu, lobi kotutun susuyan pogun.
“Suai ko’ pokikitanan, seminar pinotomod maan pohoroo’ miboros kaantakan oponsol, ‘tokoh’ pogun om kinoburuon Sabah mantad sunduk pulitik, ikonomi om sosiol.
“Kopomoromitan diti ramaion nogi’ do Ponongkusan Tadau Sabah i kopotimung tutumanud mantad oinsanan watas hinombo oinsanan tutumanud tumimung id Padang Merdeka mogowit bondira Sabah sabaagi kopokitanan pisompuruan om koondosan ontok tadau limunduk do orikot.
“Pikikiro kotonudan ponongkusan diti nopo nga’ kosigampot lobi 4,000 tutumanud mantad mogisusuai watas naamot ginumu’ koinsanai tutumombului po’ompus kapamaramaian pikikiro amu’ okuri’ mantad 10,000 tulun,” ka disio ontok rinubaan media katalib pinoniipan Dokumentari Tadau Sabah om ababayan Kami Bah Ini (KBI) id Kompleks Bersepadu Komontirian Piromutan (KBKK) do hiti, di tadau Kolimo.
Ka di Dr. Jeffrey, ponuang suai kaampai pialaan sipoot id tikid watas, sinusulap taakanon koubasanan om konsot i kopokito artis nokoiyonon om kaparangahan sinding-sinding patriotik.
Isio po nogi’ Ponorikohon Puruankusa’ Induk Pamaramaian Tadau Sabah 2025 pinopoilo pisuayan kaparamaian toun diti nopo lobi poposotol kumaa haal susuyan kahandaman om ponontudukan.
“Tadau Sabah diti okon ko’ ramaion nopo nga’ silihon somboogian mantad kurikulum sikul mooi do tangaanak tokou kotutun kointutunan pogun pointonod id timpohon sikul.
“Pokionuon ku nogi’ o tangaanak woguan nung komilo, monsupu’ tongo’ sinding-sinding i karait do Tadau Sabah om Tadau Kinomordikaan Sabah,” ka disio.
Dr. Jeffrey lumansan nogi’ mooi do kapamaramaian dilo’ okon nopo ko’ osili kaparagatan toun-toun di aramai nga nogi’ koiyonon monginggirot tungkusan susuyan kahandaman om monuridong sunduan ‘patriotisme’ rayat Sabah.
