Fredian Gan
KOTA KINABALU: Puru Kounsol Akawas Parti Bersatu Sabah (PBS), Datuk Fredian Gan minulai pinopointalang sokodung poinponu’ kumaa Ponowoli Presiden PBS i po nogi’ Kumoduo Boyoon Montiri II, Datuk Seri Dr. Joachim Gunsalam nosusuhut totondos pinopisawit disio di kokusutan lisin ‘perlombongan’ (pongukadan) id Sabah.
Minongompi ruputan i pinosoliwan Malaysiakini sabaagi somboogian mantad “kimpin totondos i nulud om kituduan pulitik”, Fredian minoboros totondos dilo’ kituduan popolomog kopomuruanan Sabah om momiraag ngaran osonong PBS.
“Poingudong ogirot oku miampai di Dr. Joachim. Totondos aiso’ padaahan diti i aiso’ kointalangan di ogirot om atalang nopo inggisaman napalan montok papaatu’ kopomuruanan PBS. Dr. Joachim kiharo rikod surupukaraja’ koporintaan, tinonggungan om kinotulidon di ogirot,” ka disio.
Fredian pinopolombus nogi’ korosian di waya’ pulitik i nokotonu’ gisom kopohompit bagas Montiri Pisompuruan om tokoh laid PBS, Datuk Seri Dr. Maximus Ongkili.
“Kopotongob kopio soira’ songulun ‘negarawan’ pantangon miagal di Datuk Seri Dr. Maximus Ongkili – i hinapadan toun no do pinapatahak supurukaraja’ id koporintaan – nga’ pinasawit miampai aiso’ nimpohon di ogirot. Okito iti sabaagi kapanangadan poinbuntuk okon nopo ko’ kumaa sosongulun nga nogi’ kumaa nimpohon kopomuruanan PBS om kopomorintaan id Sabah.”
Pinopolombus isio sokodung poinponu’ kumaa di Kumoduo Presiden PBS, Datuk Seri Jahid Jahim, i pinangaran po nogi’ id ruputan media miampai aiso’ kointalangan di otopot.
Fredian minokianu oinsanan puru PBS, koombolutan id piomungan GRS om rayat Sabah do tumilombus otoronong, misompuru om mongingkanan kumaa sondikoton di lobi kagayo.
“Iti okon ko’ timpu aampawong di pagkakaa toi uhu habar ‘sensasi’. PBS pointatap tumopot do manahak surupukaraja’ kumaa rayat Sabah om amu’ kasansala’ di pinsingumbalan montok mongurias dahai.”
Fredian nga’ minongunsub Suruhanjaya Pongilagan Susuap Malaysia (SPRM) do popoindalan ponoriukan miampai poinpuil, aadang om otulid kohondot kobolingkahangan diti.
“Pologogon SPRM popoindalan karaja’ diolo’. Romiton dahai nunu-nunu ponoriukan di pohimagon tumanud undang-undang – magada’ susuyan di pinasansala’ miampai poinpulitik. Gisom ointalangan kisala’, lansanon dahai apatut onuan kopotutan montok komoyon do amu’ nakasala’.”
Fredian minonokodung nogi’ kointalangan di Kumoduo Boyoon Montiri I po nogi’ Presiden StarSabah, Datuk Seri Dr. Jeffrey Kitingan, i minongomi kokusutan diti sabaagi inggisaman napalan montok momindsala’ koporintaan pogun GRS dumontol pomilian agayo pogun diti obontol.
