Hajiji pinopowonsoi gimik kinopoimpuunan Borneo.TV.
KOTA KINABALU: Sabah kotilombus mongulud laang id kaganaan koposolimbahan digital soira’ di Boyoon Montiri, Datuk Seri Haji Hajiji Haji Noor pinopoimpuun Borneo.TV, songinan pawaya’an (platform) ‘penstriman’ wagu i kopointanga’ wuros, rolou om koubasanan pgoun kumaa nayatan sompomogunan.
Platform miampai ‘slogan’ “Cerita Sabah di Mata Dunia” (“Sabah in the Eyes of the World” toi “Sabah id mato Pomogunan”) dilo’ kosili pawaya’an agayo papatahak suang di otopot, ‘dokumentasi’ sandad, seni koubasanan om kinolumison sandad posorili’ Sabah maya’ ponginsomokan digital di lobi wagu, milolokud om pointongkop pomgounan (global).
“Iti okon ko’ kopoimpuunan nopo do media digital, nga’ iso’ sinasawat montok tangaanak Sabah do mimburu’ (berkarya) om monuridong kokitanan pogun maya’ susuyan sondiri,” ka disio ontok pinopoimpuun Borneo.TV id Lintuhun Bankuasi, Menara Kinabalu do hiti, di tadau baino’.
Hajiji minoboros, kinopoimpuunan Borneo.TV nopo nga’ laang kohunung id timpu media penstriman Over-The-Top (OTT) i amu’ nodi tumalahan kumaa pawaya’an ‘konvensional’ (kinoubasanan), suai ko’ manahak kosiwatan kumaa monsusupu’ ponuang nokoiyonon lumapus pidagangan lobi kagayo.
“Kinosimbanon gaya pamamasi mogigiyon babaino’ diti – mantad piromutan gisom pomolihis, koinsanai nga’ maya’ digital. Borneo.TV nopo nga’ simbar kohunung kumaa kosimbanon diti om kosiwatan montok dati’ tumigulai miampai ponuang sondiri,” ka disio.
Ka disio, koporintaan pogun manahak sokodung poinponu’ kumaa kopoindalanan Borneo.TV tu’ okon nopo ko’ platform koposolimbahan, nga kakamot kosudong papatahak susuyan otopot rayat Sabah kumaa pomogunan.
“Pomogunan koposolimbahan noondo diti monugat do ‘kreativiti’, kinobulunon om kosodingon kumaa di pokionuon mio’ontong. Pokionuon ku Borneo.TV kosili kosiwatan montok mongumbal kinoubasanan, popointanaga’ pomusarahan wagu om popointutun wuros otopot do Sabah,” ka disio.
Hajiji nga’ pinoposotol nogi’ do tongo’ pakakaraja’ Borneo.TV nuru’ do mintong karaja’ diolo’ okon ko’ karaja’ teknikal tomod nopo, nga’ sabaagi iso’ koyuon seni kreatif i koponuridong kokitanan pogun. Ponuang di posolimbahon mositi’ mogowit koyuyuon, kointutunan om susuyan di koponginsonong.
Pinokianu nogi’ disio tongo’ mimparagat seni, magagampawong digital nogi’ papamanau pomorunan kreatif nokoiyonon do momoguno poingundar Borneo.TV sabaagi koiyonon popointanga’ karya sandad om rolou mogigiyon Sabah miampai kopotonggoi ngaawi om kitonggungan.
Ababayan dilo’ nokopokito po nogi’ pinialaan Memorandum Pihunungan (MoU) id pialatan koporintaan pogun nobian do Sekretariat Sabah Maju Jaya (SMJ) om IB Media Consultant Work Sdn. Bhd., komponi popopoindalan Borneo.TV i papanahon miampai aiso’ nunu-nunu ponguhupan kousinan mantad koporintaan pogun.
“Model kopoindalanan diti kopokito tonggungan om kotumbayaan siktor swasta kohondot kosiwatan koposolimbahan digital id Sabah. Otumbayaan oku ponginsomokan diti kopo’iliu Borneo.TV sabaagi impohon di kiginoris monokitopong om ogirot,” ka disio pinopointalang.
Hajiji minonongkounsikou nogi’ kumaa Sekretariat SMJ om IB Media mantad kinalantaion minonuluk kopoindalan Borneo.TV id siriba’ Palan Sondikoton SMJ 1.0, i poposotol koburuon siktor ikonomi kreatif sabaagi iso’ mantad koposiahan oponsol pogun.
“Pokionuon ku oinsanan bohogian koporintaan, swasta om mogigiyon, montok tumonggoi monokodung inggisaman diti om momgouno kosiwatan diti montok monsupu’, miilang om papatahak susuyan Sabah miagal di pokimamahaan tokou sondiri’ do okito pomogunan,” ka disio.
