Dr. Joachim (tanga’) ruminuba’ dilo tongo’ Upisor Eksekutif i nokotindapou id ramai dilo’.
KOTA KINABALU: Kumoduo Boyoon Montiri II, Datuk Seri Dr. Joachimg Gunsalam pinoposorou oinsanan kotinanan id siriba’ Komontirian Koporintaan Koiyonon om Pomuwalaian (KKTP) kaampai Bohogian Kikuasa’ Nokoiyonon (PBT) do monginsikap panalasaian ruputan rayat, kopiongoi di tonggungan diolo’ sabaagi papatahak surupukaraja’ koporintaan id nayatan siriba’.
Isio po nogi’ Montiri KKTP minoboros, nunu-nunu kobolingkahangan i aanu salasaion miampai mitilombus kiguno soibahan miampai osisikap om amu’ nuru’ mindad ponuhupan potilombus, montok papatantu’ kotundunan rayat toririmo kosili tingkananon.
“Orohian oku poposorou oinsanan montok manahak surupukaraja’ bobos osonong kumaa ‘stakeholder’ tokou do hilo’ id labus. Potontuon ruputan om kobolingkahangan i poinhompit ‘skop’, tonggungan om kaganaan karaja’ tokou salasaion miampai poinsonong,” ka disio ontok minoboros id Ramai Tadau Raya Aidilfitri om Kaamatan onjuran KKTP id Lobi Wisma Innoprise do hiti, di tadau baino’.
Dr. Joachim (kotolu, gibang) pinopotunui setifikit kumaa Bontugan Pialaan ‘Keceriaan Gerai’ Bohogian Kikuasa’ Nokoiyonon i nalantoi do Kounsol Watas Sipitang kopihondot pamaramaian Tadau Raya om Kaamatan KKTP, id Lobi Wisma Innoprise di tadau baino’
Dr. Joachim minoboros, kaawagu diti Pitimungan Lintuhun Undangan Pogun (DUN) Sabah nakapanau om nosili koiyonon montok popoindalan ‘check and balance’ kumaa di kopoindalanan karaja’ nogi’ tonggungan komontirian, kotinanan om PBT.
Ka disio, pitimungan dilo’ nosili nogi’ koiyonon oponsol montok maganu kointalangan kohondot ngaawi’ di tongo’ kobolingkahangan maso-maso i naantakan id kinoiyonon, kohondot dilo’ oponsol kopio montok tikid upisor popoindalan karaja’ miampai opulokis om kitinonggungan.
Daamot idlo’, pinopolombus isio pongunsikohan kumaa oinsanan puru karaja’ KKTP, kotinanan id siriba’ komontirian om PBT mantad no do karaja’ om tinonggungan diolo’ id kinapatahakan surupukaraja’ kumaa rayat.
“Buru’ tokou adangon do rayat. Tikid laang om kootusan kiguno kopokito tinonggungan, kinotulidon om kabaalon di akawas sabaagi pakakaraja’ koporintaan,” ka disio.
Dr. Joachim (kolimo, gibang) miampai tombului apantang i nokotindapou luminoyou nogi’ do loyou Tadau Raya id ramai dilo’.
Dr. Joachim pinoposorou nogi’ do kalantaion komontirian okon ko’ tumalahan kumaa sosongulun no, nga’ mantad pogiuhupan om inggisaman oinsanan bohogian di kohompit.
Id ramai dilo’, lobi 500 puru KKTP, kotinanan om PBT nokotindapou minamaramai pamaramaian Tadau Raya Aidilfitri om Kaamatan i rinamai oinsanan id koyuon di oulud.
Nokotindapou nogi’ i Monguhup Montiri KKTP, Datuk Isnin Aliasnih; Ponorikohon om Monijor Agayo Kotinanan Koburuon Pomuwalaian om Kakadayan (LPPB), Datuk Masiung Banah om Datuk Rosemary Ahping; Monunurat Pointatap Komontirian, Datuk Dr. Jamili Nais; Ponorikohon Sabah Softwood Berhad, Datuk Mohd. Arsad Bistari; Monunurat Pulitik kumaa Boyoon Montiri, Datuk Dr. Roland Chia; Kumoduo Monunurat Pointatap I KKTP, Tpr. Stanley Chong; Kumoduo Monunurat Pointatap II sabaagi Ponorikohon Manganganjur, Faridah Giau.
