Dr. Joachim Gunsalam
PUTATAN: Koporintaan pinopoobi’ RM11.15 riong montok kopoindalanan mogisusuai kaparagatan om projik ‘landskap’ id pototongkop Sabah montok toun diti, ka di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Minoboros isio, kopoobian dilo’ kopohompit kousinan mantad Koporintaan Pisompuruan om Pogun om poikidon kumaa oinsanan Bohogian Kikuasa’ Nokoiyonon (PBT) id Sabah montok kopoburuan om koponginsonongan kogogonopan otomou montok kasasanangan mogigiyon.
Ka disio, kopoobian diti kopiongoi di inggisaman palan koburuon lansdkap pogun Sabah i poposotol koponsolon kopomogompian, kolumison pososorili’ om piadangan ikologi id kopoburuan kakadayan om labus kakadayan.
“Karati oku do kogunoon kousinan montok PBT id inggisaman popoburu’ om monginsonong kogogonopan infrastruktur otomou montok kasasanangan mogigiyon koiyonon. Mantad dilo’, kopiongoi di inggisaman pamalanan koburuon lansdkap pogun Sabah, soginumu’ RM11,150.000 pinoobi’ montok kopoindalanan kaparagatan om projik lansdkap diti toun 2025,” ka disio ontok pinapatahak Pason Pinotomod Montiri kopihondot Ababayan “I P.L.A.N.T.” id Taman Pasir Putih Fasa 1, do hiti, di baino’.
Boboroson disio binasa’ di Monguhup Montiri Koporintaan Koiyonon om Pomuwalaian, Datuk Isnin Aliasnih.
Isnin (kaapat, gibang) pinapatahak geran projik Ababayan Lansdkap 2025 kumaa di Upisor Eksekutif Kounsol Lahad Datu, Jacley Gielbert om sinasi’ dii Monunurat Pointatap Komontirian, Datuk Dr. Jamili Nais (kotolu, wanan) nogi’ Ponorikohon Manganganjur miuhup Lar. Nurulhayati Awang More (wanan) om Upisor Eksekutif Kounsol Watas Putatan, Helmy Taib (gibang) nogi’ tongo’ nangaalap di suai.
Ababayan “I P.L.A.N.T.” (Inisiatif Penghijauan ‘Lestari’, ‘Aspirasi’ Negeri Taman Terindah) nopo iso’ mantad laang komontirian montok papagaras kopomogompian lansdkap pogun Sabah maya’ piuhupan ogirot miampai PBT.
Dr. Joachim minoboros, ababayan diti okon ko’ ponokotanda’ nopo pananaman kayu, nga nogi’ ababayan kosudong i koowit kumaa sondikoton timpu anaru koburuon po’ompus om ikonomi otomou.
Gisom tulan Kohopod om Duo 2024, soginumu’ 331,151 kayu di natanom id siriba’ababayan diti, nga’ ginumu’ dilo’ kakal osodu’ mantad sondikoton 1.3 riong kayu dumontol toun 2033, i pinahabar pointonod kinopoimpuunan dilo’ di toun 2020.
“Ginumu’ diti kopokito kakal ogumu’ i kiguno powonosiyon, om unsubon ku oinsanan PBT do tumilombus popogirat kimpin kopotomohan nogi’ popoindalan sondiri’ inggisaman pananamon kayu id kinoiyonon sompoopori,” ka disio.
Suai ko’ pananaman kayu, komontirian nga’ aparagat nogi’ papaanjur mogisusuai kaparagatan kopurimanan om ponontudukan miagal do Festival I-HIJAU KKTP, Bingkil ‘Resolusi Hijau’, nogi’ kohomboan miampai PBT kumaa mogisusuai watas do popointutun nubasanan otomou id nayatan siriba’.
Ka disio, komontirian pinopointutun nogi’ ababayan komuniti miagal ‘Kebun Komuniti’om ‘Rakan Lestari, maan do inggisaman montok mongunsub kogompitan mogigiyon miampai mitilombus id kapanamangan om kopomogompian kotilombuson pososorili’.
Dr. Joachim minoboros, wookon ‘prinsip’ oponsol di posotolon do komontirian nopo nga’ ikonomi ‘kitaran lestari’, i kopohompit pomogunaan intodonon miampai monidsorou, kopongingkurian waya’ karbon, kopoburuan tikonomi otomou om pomogompian sandad posorili’.
Pinosotol po nogi’ disio koponsolon kapasarabakan koyuon ‘kejiranan hijau’ id pomomonsoi koponuridongan pomuwalaian om kakadayan, kaampai pomogunaan ginoris aanu monginwagu, kogogonopan ponuridong oulud om koposodiaan liwang otomoou ginumuan.
Ka disio kawagu, komontirian misokodung nogi’ miampai Koporintaan Pisompuruan id mogisusuai ababayan miagal ‘Agenda Komuniti Lestari’, projik ‘Low Carbon Schools’ om kopoindalanan SDG Roadmap om ‘Voluntary Local Riview (VLR)’ id limo PBT nopili’ id Sabah.
“Oinsanan diti nopo somboogian mantad inggisaman misompuru montok poposili Sabah sabaagi pogun taman omulis, i okon nopo ko’ olumis id lansdkap nga nogi’ poinggompi’ id ikonomi, sosiaol om sandad posorili’,” ka disio.
Minongunsikou kumaa oinsanan bohogian i nokotindapou om minonokodung inggisaman diti, kaampai kotinanan koporintaan, mongongobi’ PBT om mogigiyon nokoiyonon, Dr. Joachim minokianu oinsanan bohogian do mogisokodung, monginggirot tonggungan om tumilombus popoindalan tonggungan miampai poinponu’ ginawo montok komogoton om kopomogompian Sabah.
