Ghullam Hassan (koduo, gibang) ruminamit cek Koponguludan Walai Tanak Yatim om Tahfiz 2025 mantad di Tun Musa sinasi’ di Raisin (gibang), Arifin (tanga’) om i Alamin (wanan).
MEMBAKUT: Balajaran pinogi’iso’ i ginuno id Sikul Osiriba’ Integrasi kaanu mongimbulai sinakagon di kitoilaan, ki’iman om kipogoyuon osonong.
Molohingon Agayo Pogun Sabah Tun Musa Aman minoboros, sikul okon nopo ko’ kotinanan balajaran, nga nogi’ koiyonon montok monuridong tulun di kipogoyuon osonong, kiginoris tumopong om posodia’ momuruan ummah.
“Kopuriman tokou oondos tu’ Sikul Osiriba’ Integrasi Khalia Khan diti nopo nga’ sikul kumolimo id Sabah om kosili sikul ko 230 id Malaysia i nakaramit ko’oitan Sikul Ugama’ Ponguhupan Koporintaan.
“Kinoimbulayon sikul diti kopokito kinotopoton bohogian kikuasa’ id koponguhupan mongimbulai sinakagon di okon nopo ko’ kinaangayan id toilaan doun pomogunan nga nogi’ ogirot nigitan ugama’ dau,” ka disio.
Tun Musa pinoposorou nogi’ tonggungan mongingira’ id koponudukan suusmikul miampai poinponu’ ginawo om kinotoboion montok papatanu’ sakag wagu kiginaras tumopong om kipogoyuon osonong.
“Tongo’ susumikul kiguno papatanom angkab do toilaan di aanu okon nopo ko’ montok kalantaion pomogunan, nga nogi’ sabaagi kokoriu kumaa akhirat,” ka disio ontok minoboros pinopoimagon Sikul Osiriba’ Integrasi Haji Khalia Khan Membakut, doros hiti di tadau kolimo.
Id ababayan dilo’, Ponoirkohon Kotinanan Ponguludan Sikul, Herwan Harun minamaramit toluod MUIS montok kopoindalanan Sikul Osiriba’ Integrasi (SRI) 2025 kiginumu’ RM70,000 i pinotunui di Tun Musa naamot Toluod Koponguludan Walai Tanak Yatim om Tahfiz 2025 pinatahak nogi’ kuminaa Monunuridong Walai Tanak Yatim om Tahfiz Darul Yatama Yacob Khan, Datuk Gullam Hassan Yacob Khan kigatang RM240,000.
Nokotindapou nogi’ i Montiri Sains, Tiknologi om Inovasi, Datuk Dr. Mohd. Arifin Mohd. Arif; Kumoduo Montiri Labus Pogun po nogi’ Puru Parlimen Kimanis, Datuk Mohammad Alamin; Mufti Koporintaan Pogun Datuk Bungsu @ Aziz Jaafar; Potunud Koupisan Balajaran Pogun Sabah, Datuk Raisin Saidin om i Kumoduo Molohingon MUIS, Datuk Malai Ali Malai Ahmad.
SRI Haji Khali Khan i minonimpuun surupukaraja’ dau di toun 2017, miampai pohimagon poinrojistor sabaagi Sikul Ugama’ Ponguhupan Koporintaan (SABK) id siriba’ Komontirian Balajaran Malaysia di ko 4tw Kohopod om Iso’ 2024.
Miampai ko’oitan sabaagi SABK, sikul dilo’ kalansanan kotilombus koburu’ kosili longkod balajaran i kaanu mongimbulai tulun kitoilaan, ki’iman om kipogoyuon osonong, kopiongoi di falsafah balajaran Islam di poinpuli.
Kapt:
