Andi Suryady (poindikau) suminain ontok kinorikotan id ababayan dilo’.
TAWAU: Ababayan Bomba Komuniti om Sedia Urus Risiko Suang Walai (SURI) kiharo tonggungan oponsol monguhup Koupisan Bomba om Manampasi Malaysia (JBPM) mongilag kotutudan mantad kosili lobi kadala’.
Monguhup Montiri Koburuon Pomorunan om Mongindapu’, Datuk Andi Suryady Bandy minoboros, goduduo inggisaman diti kapanahak kopoilaan nogi’ pingludaan kumaa mogigiyon kokomoi laang osopung i nuru’ onuon ontok aantakan kotutudan.
“Ababayan diti kituduan mongingkawas kopurimanan mogigiyon kokomoi pongilagan om ralan monoibau kotutudan miampai lobi kiwaya’.
“Bomba Komuniti om SURI kapaampai do tulun i nonuan pingludaan pinotomod montok papatantu’ laang osikap aanu pogulu korikotan tinimungan bomba,” ka disio katalib pinopoimagon Ababayan Kimpin Ops Koumoligan Kotutudan Kopihondot Timpu Karamaian Tadau Raya Aidilfitri Nayatan Pogun Sabah id Bataras Hypermarket, di tadau Kaapat.
Ka disio, koporintaan lumansan lobi kogumu’ tinimungan bomba aanu monuridong lolobi no id koiyonon kampung i sasaru’ kotoguang kaantakan kotutudan, montok papasanang laang osopung do maganu pogulu karalad o tapui.
Daamot dilo’, i Andi po nogi’ Puru Parlimen Kalabakan minongunsub lobi kogumu’ koonduan umampai ababayan SURI montok mongingkawas kopulokison diolo’ id koponoguangan kaantakan kopoligogon id ropuhan.
“SURI manahak kosiwatan kumaa koonduan do minsingilo laang aarau-arau di kohunung, lolobi no id koponoguangan kotutudan i sasaru’ kotimpuun id ropuhan gama-gama’ kinologowongon miagal kolihu momisok ropuhan gas.
“Miampai komilaan diti, kaanu yolo’ mongilag kotutudan mantad kosili lobi kadala’,” ka disio pinopointalang.
Daamot dilo’, Potunud JPBM Pogun Sabah, PKPjB Jainal @ Zainal Madasin minoboros, kimpin diti kituduan mongingkawas kopurimanan mogigiyon kokomoi laang koumoligan kotutudan, kaampai no pingludaan kopongiduanan walai miampai poingulud om pomogunaan kakamot pomisok tapui di kohunung.
“Kimpin diti nokotimpuun pointonod kolimpuunon Ramadan di ko 3tw Kotolu katatalib om poindalanon maya’ mogisusuai kaparagatan, kaampai kopoilaan koumoligan kotutudan kumaa Bomba Komuniti om tutumanud SURI id koiyonon rurubpuon ginumuan dumontol kararamaian,” ka disio.
Ka wagu di Jainal, pingludaan dilo’ pinoindalan di momoluda’ kikabaahan mantad JPBM om kopohompit 20 koonduan suri walai mantad Kampung Tanjung Batu.
