Dr. Jeffrey Kitingan (gibang) om i Bung Moktar Radin.
KOTA KINABALU: UMNO Sabah amu’ nakaanu minonuluk batos i winonsoi pogulu Pomilian Agayo Pogun (PRN) 2020, nokopokito do momumuruan dilo’, Datuk Seri Bung Moktar Radin amu’ kosudong karamit kotumbayaan rayat, ka di Kumoduo Boyoon Montiri I, Datuk Seri Dr. Jeffrey Kitingan.
Ka di Dr. Jeffrey, i duo po tadau pogulu tadau ponomponan kopomungaranan calon, UMNO Sabah om Barisan Nasional (BN) nakaakun tuminanding id 27 no timpohon. Nga’, amu’ diolo’ tinumboyo’ pinibatosan dilo’ om tohuri nopo dii nga’ tuminanding id 41 watas.
“Noondo, miampai amu’ oikuman do moboros i Bung karait momili’ tambalut pulitik i monopot do batos,” ka disio id kointalangan di tadau baino’.
UMNO Sabah tuminanding id 32 timpohon, naamot Parti Bersatu Rakyat Sabah (PBRS) om MCA sopipoopori tuminanding id limo om apat timpohon.
“Minoboros i Bung kaagal-agal do aanu isio ponungkayanan, dadamot do i nopo naantakan di 2020 nga’ iso’ kinoponolikudan minonigowo i atalang kopio do winonsoi dau,” ka kawagu di Dr.Jeffrey.
Bung i po nogi’ Luguan BN Sabah, pogulu diti pinopoilo do UMNO Sabah misokodung no miampai di parti i monuluk batos, tumanud nawayaan di nakatalib i minonuduk diolo’ do lobi monidsorou id kopomilian tambalut pulitik.
Naamot dilo’, Dr. Jeffrey i po nogi’ Presiden Parti Solidariti Tanah Airku (STARSABAH), otumbayaan do parti pembangkang pakayaán id kaálaan agayo id PRN obontol.
PRN Sabah ko-17 nuru’ do pohoroon solalaid dilo’ do ko 6tw Kohopod om Duo toun diti, kopiongoi di Perkara 21(4) Perlembagaan Pogun Sabah.
“Nokosodia’ no yahai monoguang pomilian agayo sabaagi songinan piomungan di osompuru om kiangkab montok rayat Sabah, om otumbayaan oku do rayat poingampai dahai,” ka disio.
Pinosotol nogi’ disio do Sabah id koyuon di ogirot id siriba’ kopomuruanan GRS-PH Plus i buruanon di Boyoon Montiri, Datuk Seri Haji Hajiji Haji Noor. Ka disio, kaadangon diti oponsol kopio montok kasasanangan rayat nogi’ kosili posikap kopio kopoburuan ikonomi pogun.
Nga’, pembangkang tumilombus popobigod mogisusuai totondos om pongumang-umang kumaa koporintaan GRS-PH Plus.
“Nunu nopo totondos di patayadon do pembangkang tohuri nopo nga’ amu’ koowit rati soira’ orikot timpu kikobolingkahangan,” ka disio.
Id timpu diti, GRS nopo nga’ piomungan walu’ parti, ilo’ nopo nga’ Parti Gagasan Rakyat (Gagasan Rakyat), Parti Bersatu Sabah (PBS), STARSABAH, Parti Maju Sabah (SAPP), Kotinanan Kabansaan Sabah Misompuru (USNO), Parti Demokratik Liberal (LDP), Parti Harapan Rakyat Sabah (PHRS) om Parti Cinta Sabah (PCS).
