Masiung (koduo, wanan) miampai di Hajiji pinapatahak ponguhupan Walai Mesra SMJ id ramai Iftar Ramadan dilo’.
KINABATANGAN: Kosimbanon koyuon pulitik pikikiro aantakan id koiyonon tungkusan UMNO, ilo’ nopo nga’ Sukau om Lamag, soira’ Parti Gagasan Rakyat Sabah (Gagasan Rakyat) minonuridong nuludan wagu i nokoinggirot.
Timbang Presiden Gagasan Rakyat, Datuk Masiung Banah, minoboros parti nokoiyonon dilo’ popotigulai calun bobos osonong id Pomilian Agayo Pogun (PRN) ko-17 montok magahou timpohon id goduduo koiyonon dilo’.
“Mimpau raramit osonong id duo kinotombuluyan Boyoon Montiri, Datuk Seri Hajiji Noor, kuminaa Sukau, atalang kopokito do parti diti kororohian om kaanu sokodung kogumuan mogigiyon siriba’,” ka disio kumaa media ontok minananud di Hajiji id ramai Iftar Ramadan doid Masjid Tun Juhar, i notindapou lobi 3,000 mogigiyon Sukau om Lamag.
Ka disio, id ramai Himpunan Gagasan Rakyat Sukau/Lamag di tulan Koturu’ 2023, Hajiji nakaramit nogi’ raramit lobi 7,000 rayat id Dataran Sukau, nokopokito kotumbayaan mogigiyon kumaa parti dilo’ nokoingkawas.
“Gagasan Rakyat nopo parti nokoiyonon om otumbayaan yahai kaanu sokodung agayo montok lumantoi timpohon Lintuhun Undangan Pogun (DUN) Sukau om Lamag.
“Lanskap pulitik id goduduo DUN diti kotoguang ksoimbanon atalang pototohuri diti. Gagasan Rakyat, miampai tongo’ parti komponen Gabungan Rakyat Sabah (GRS), gumirat kumaraja’ montok papatantu’ kalantaion id PRN obontol.
“Yahai id koporintaan toririmo monuluk batos, sopisuai di pembangkang i komilo no mimpomonsoi sorita’ om papasasad batos oudut. Yolo’ nga’ asaru’ nogi’ moninong kobolingkahangan mongimbulai kotogodon kumaa lansanon koporintaan,” ka disio.
Masiung, po nogi’ Puru Lintuhun Koundangan Pogun (ADUN) Kuamut, pinoposotol do Boyoon Montiri pogulu diti minanahak jominan montok papatahak kopomodulianan pinotomod kumaa koburuon Sukau om Lamag.
“Laang monuridong Upis Watas Okoro’ Sukau notumboyo’ di ko 15tw Koduo katatalib, suai ko’ ponuridongan lintuhun wagu id Sukau miampai kinopoobian soginumu’ RM3 riong,” ka disio.
Id ramai mongukab puasa dilo’, Hajiji pinapahabar nogi’ inggisaman monginsonong Masjid Tun Juhar.
Kohondot dilo’, Upis Watas Okoro’ Sukau om Puruankuasa’ Masjid sinuhu’ popotoguang kooturan karaja’ do osisikap.
