Julita Majungki
KOTA KINABALU: Parti Bersatu Sabah (PBS) mamaramit kinouliton toun dau di ko-40 miampai gonsuhatan nga’ kirati id Lintuhun Hakka, do hiti, ontok ko 5tw Kotolu.
Ababayan dilo’ kopotimung kikiro 1,000 lansanon bohogian, kaampai mobi’ mantad Koonduan om Komulakan parti.
Iso’ video oniba’ i momuhondom sunduan 1985 maan patayango’, kopokito ‘misi’ om ‘visi’ parti i po’ompus montok Sabah om rayat dau.
Wookon ababayan pinotomod nopo kopoimpuunan logo kinouliton toun ko-40 PBS nogi’ kapatahakan tutungkap kumaa di minomonsoi logo dilo’.
Monunurat Agayo PBS, Datuk Julita Majungi i po nogi’ Ponorikohon Puruankuasa Manganganjur minoboros, pipiro ababayan miagal pialaan golf, boling om mimbuul saalom maan pohotoo’ sabaagi wookon mantad posodiaan dumontol ramai makan totuong dilo’.
“Presiden PBS, Datuk Seri Dr. Maximus Ongkili, Monunuridong om Monontuduk Apantang, Tan Sri Joseph Pairin Kitingan nogi’ Ponowoli Presiden, Datuk Seri Dr. Joachim Gunsalam kotindapou id ramai diti,” ka disio.
I Julita minoboros, id boboroson disio, Dr. Joachim, i po nogi’ Kumoduo Presiden PBS pikikiro popoloting sondikoton timpu dumontol parti om poposorou di tongo’ puru karait tonggungan diolo’ id kopotilombusan PBS sabaagi iso’ kuasa’ pulitik di ogirot.
Dr. Joachim nga’ pikikiro nogi’ poposotol kawagu tonggungan PBS kumaa piomungan Gabungan Rakyat Sabah (GRS), hinombo do parti dilo’ nopo nga’ komponen koduo bobos agayo.
