Hajiji miampai di Fauzan Maksud om paganakan id Walai Mesra SMJ diolo’ doid Kampung Serusup.
TUARAN: Boyoon Montiri (KM), Datuk Seri Haji Hajiji Haji Noor insan po minongunsub koinsanai mobi’ rayat om lansanon id guas tumilombus miontong nogi’ papatantu’ projik koburuon id kinoiyonon sompoopori opongo tumanud timpu nakatantu’.
“Nosunudan ku yolo’ i poinggompit montok mamalan om mintong nunu kogugunaan mogigiyon. Molohingon Kampung om Puruankuasa’ Koumoligan om Komogoton Kampung (JKKK) mositi’ ‘proaktif’ id haal diti,” ka di Puru Lintuhun Undangan Pogun (ADUN) Sulaman dilo’ soira’ rinubaan katalib minooi intong koiyonon projik Walai Mesra SMJ om projik okoro’ id kinoiyonon disio di tadau baino’.
Hajiji sinuau dilo tongo’ monginginsada’ id jeti Serusup-Penimbawan.
Karait projik Walai Mesra SMJ, Boyoon Montiri minoboros kopoindalanan dilo’ id pototongkop pogun nopo nga’ konsontob.
“Yolo’ i kosudong mamaramit Walai Mesra SMJ nopo nga’ tinimungan i otootopot momoguno. Mantad dilo’, iti nopo nga’ projik kiwaya’ akawas i onuan koposuulan,” ka disio.
Nokopogulu, Hajiji minooi tombului doid Kampung Lok Batik, Kampung Pendamai, Kampung Tambalang, Kampung Indai om Kampung Serusup minooi intong kinoburuon projik id kinoiyonon ngaawi dilo’.
Iti kaampai projik monginsonong talun-alun id Kampung Lok Batik om Kampung Pendamai, ponuridongan Walai Mesra SMJ id Kampung Indai om Kampung Serusup, nogi’ pamansaian parit id Kampung Tambalang.
Boyoon Montiri minomupus kinotombuluyan disio doid jeti Serusup-Penimbawan i nopongo minomonsoi doid Kampung Serusup.
