Haji Hajiji Haji Noor
KOTA KINABALU: Oinsanan Longkod Poundolihan Naamot (PPS) id koinsanai watas i noumpadan do liyud id Sabah sinompon, nosusuhut kadaaton dilo’ i notonduli’ poinponu’.
Boyoon Montiri, Datuk Seri Haji Hajiji Haji Noor minoboros, Sekretariat Puruankuasa’ Ponguludan Kadaaton Pogun (JPBN) Sabah pinopoilo kinoponomponan koinsanai PPS id Sabah.
Minongunsikou isio kumaa oinsanan pakakaraja’, koupisan om kotinanan koporintaan i nokohompit id karaja’ manampasi om kinopoundolihan tongo’ nogompitan di maso kadaaton liyud naantakan.
“Monongkounsikou oku nogi’ om pamagatangan kumaa oinsanan bohogian, kaampai tulun ginumuan, kotinanan okon koporintaan, koisaan om minsosongulun i nokohompit i potuu miampai mitilombus toi amu’ mitilombus id kinoponguhupan nongogompitan liyud di maso kadaaton dilo’,” ka disio id kointalangan, di tadau baino’.
Ka di Hajiji, sundung tongo’ watas i nohompitan do liyud pogulu diti pinopoimagon do kadaaton dilo’ notonduli’ om nopupusan, nga’ mogigiyon kampung lolobi no i poingiyon id koiyonon di obinliyudan nuru’ toririmo mingat-ingat om sumosodia’ nosusuhut koyuon tawan i osusa’ monondu’.
Ka disio, JPBN om Watas nga’ nuru’ nogi’ toririmo sumosodia’ om momonsoi posodiaan monoguang kopikikiraan kaantakan oligogo’.
Di ko 31tw Koiso’ katatalib, koporintaan pogun minongunsikou kinapahabaran kopoobian soginumu’ RM25 riong montok monginsonong tongo’ kogogonopan i noinraagan gama-gama’ pipiro kadaaton id Sabah om Sarawak di Luguon Montiri, Datuk Seri Anwar Ibrahim.
Mantad kinopoobian dilo’, sopipoopori minamaramit soginumu’ RM10 riong montok ponginsonongan kogogonopan ginumuan id pogun Sabah om Sarawak. Naamot soginumu’ RM5 riong po ilo’ nopo nga’ sopipoopori RM2.5 riong montok pouhupon kumaa paganakan nogompitan liyud montok Sabah om Sarawak tumanud ruputan Tinimungan Pertahanan Awam Malaysia (tikid paganakan karamit RM1,000).
Ka di Hajiji, ponguhupan osikap dilo’ gunoon kopio montok monguhup monginsonong kogogonopan infrastruktur di naraag gama-gama’ kadaaton liyud id piro-piro watas doid pogun diti.
“Koporintaan Pogun mongunsikou kumaa koporintaan Pisompuruan mantad no ponguhupan osikap dilo’,” ka disio.
