Tun Musa, tinanud di Hajiji, pinapatahak tutungkap kuminaa johan qari Tilawah om Hafazan Al-Quran Nayatan Pogun Sabah, Nashraf Ideen Nahar.
KOTA KINABALU: Boyoon Montiri, Datuk Seri Haji Hajiji Haji Noor minoboros, koporintaan tumilombus tuompot poposili balajaran sabaagi posunduran agayo kopoburuan ‘modal insan’ id pogun diti, kopiongoi di katatapan koporintaan miagal poinsuang id Katatapan Sondikoton Sabah Maju Jaya (SMJ).
“Montok monokodung inggisaman dilo’, koporintaan minomorunhang kousinan Sikulasip Koporintaan Pogun Sabah (BKNS) mantad do RM51 riong no kuminaa RM128 riong do toun 2025 diti.
“Miampai pinomoruhangan i nopilipat dilo’, suai ko’ pipiro po ‘insentif’ balajaran suai, kalansanan lobi kogumu’ tangaanak Sabah kikosiwatan mamaramit ponguhupan kogogonopan balajaran, lolobi yolo’ i mongoput pinsingilaan kumaa nayatan lobi kasawat, i potuu id suang t oi labus pogun.
“Iti kaampai po nogi’ pinsingilaan id kaganaan ugama’ toi pinsingilaan Islam,” ka disio id Ramai Pinomupusan om Kinoponungkapan Ramai Tilawah om Hafazan Al-Quran Nayatan Pogun Sabah montok toun 1446H;2025M id Lintuhun Saadah doid Wisma MUIS, do hiti, di songkosodop.
Molohingon Agayo Pogun Sabah, Tun (Dr) Hajij Musa Aman pinopohimagon Boboroson Kinopohimaganan Ramai Tilawah om Hafazan Al-Quran Nayatan Pogun Sabah.
Nokotindapou nogi’ sawo di Molohingon Agayo Pogun Sabah, Toh Puan Hajah Faridah Tussin om sawo di Boyoon Montiri, Datin Seri Hajah Juliah Salag.
Naamot dilo’, Boyoon Montiri minoboros, koporintaan pogun pointatap tumopot id kopoingkawasan po do pinsingilaan al-Quran doid pogun diti.
Minoboros isio, wookon inggisaman i masaan pinggisamai nopo mongingkawas ginumu’ kopongonuan susumikul Institut Tahfiz Pogun gisom 300 tulun susumikul do timpu dumontol.
“Laang diti okon nopo ko’ orohian mongimbulai lobi kogumu’ hufaz, nga nogi’ lobi kumaa monuridong sinakagon mongupus al-Quran, ilo’ nopo tinimungan i kalansanan sabaagi popoburu’ kogomoton tinaru mimpau prinsip ngaawi’ ponontudukan al-Quran.
“Montok mamagampot imanon dilo’, koporintaan pgoun maya’ Koupisan Haal Ugama’ Islam Pogun Sabah (Jheains), moningkanan kumaa koposodiaan kogogonopan balajaran di lobi kosonong montok mongimbulai koyuon ponudukan om pinsingilaan di lobi koposimbayan.
“Iti kaampai no monginsonong sikul ngaawi’ nakalaid, suai ko’ mogintong kopikiikiraan monuridong sikul ngaawi’ wagu id koiyonon di kosudong, montok manampung kogugunoon maso-maso, kopiongoi di ginumu’ susumikul i mumu’-gumu’ potitikid toun,” ka disio.
