Haji Hajiji Haji Noor
KOTA KINABALU: Kopogisusuaian tinaru om ugama’ amu’ kapagada’ piromutan nga’ kouhup monuridong songinan mogigiyon di oulud id pogun diti, ka di Boyoon Montiri (KM), Datuk Seri Haji Hajiji Haji Noor.
Minoboros isio, iti no ginaras Sabah i poingiliu kumaa kopogisusuaian tinaru, ugama’, kinoubasanan, sinakagon om boros i haro id pogun diti.
“Kanou tokou no poronit nuludan kumaa Sabah di lobi koburu’ nogi’ komogot om momusus piromutan piobpinoian di oulud diti kotilombus kosili tukod koburuon om kotoronongon pogun diti.
“Daamot dilo’, toun 2025 nopo toun koompokon montok Palan Koburuon Sondikoton Sabah Maju Jaya 1.0 ilo’ nopo montok timpu 2021-2025. Nung oonuan tokou mandat, tilombuson tokou miampai sondikoton SMJ 2.0 mantad toun 2026-20230.
“Otopot nopo, amu’ olimon Sondikoton SMJ diti nakalantoi minonimban om minonginsonong naangayan ikonomi Sabah i pogulu diti naatu’ nokoinsiriba’ gama-gama’ tomporuruol Covid-19,” ka disio id Pason Toun Wagu Sina 2025, do hiti baino’.
Hajiji minonongkounsikou nogi’ kumaa mogigiyon Tionghua mantad sokodung poómpus i pinatahak id kinopoburuan pogun diti.
“Sabaagi Boyoon Montiri, manahak oku jominan do kasasanangan mogigiyon, kaampai mogigiyon Tionghua tilombuson tingkananon.
“Kalansanan toun diti koowit nulinau kalansanan, ginaras, kounsikohan om kolidasan di osonong suai ko’ karamit lobi komogoton.
“Ounsikou tokou sabab mogigiyon Malaysia id Sabah, lolobi no i kisinakagon Tionghua mamaramit Toun Wagu Sina do toun diti, ilo’ nopo Toun Tulanut id koyuon di otoronong, oulud om poinponu’ kounsikohan,” ka disio.
I Hajiji minamason nogi’ Kounsikohan Mamaramai Toun Wagu Sina’, Gong Xi Fa Cai kumaa oinsanan mogigiyon Tionghua om i mamaramai dilo’ id pogun diti.
