Hajiji miampai tongo’ lalansanon om puru ngaawi’ komponen GRS id ababayan Jelajah Sayangi Sabah Zon 6 id Dataran Keningau di tadau baino’.
KENINGAU: Boyoon Montiri, Datuk Seri Haji Hajiji Haji Noor minamalangas pogoyuon lansanon pembangkang mantad Semenanjung i mongomi lansanon om mogigiyon pogun diti sabaagi ‘palui’ ontok ruminikot minooi ponomboros do hiti.
Pinosotol disio, koulalaho’ dilo’ nopo iso’ koponiisindaan kumaa lansanon om mogigiyon Sabah i toririmo mongigit ogirot kumaa nubasanan mimpulitik miampai osonong om moningkanan piuludan.
Ka disio, lansanon i kipogoyuon miagal dilo’ amu’ apatut rumikot kumaa Sabah tu’ nubasanan mimpulitik id Semenanjung i nowit diolo’ amu’ kosudong di nubasanan pulitik i gunoon doid pogun diti.
“Ogumu’ lansanon mantad soborong rumikot, poiloon ku yolo’, nung rumikot mositi’ kitadat rumikot id pogun tokou, kada’ owito’ pogoyuon mantad hilo’ kumaa Sabah i oulud om otoronong diti.
“Poiloon ku i Hamzah Zainudin kada’ sisindao’ tulun Sabah, kada’ sisindao’ lansanon Sabah,” ka disio ontok minoboros id Ababayan Jelajah Sayangi Sabah Zon 6 id Dataran Keningau, do hiti di tadau baino’.
Ababayan Gabungan Rakyat Sabah (GRS) Zon 6 Keningau dilo’ notindapou kikiro 10,000 mogigiyon om mononokodung GRS mantad pososorili’ Keningau om watas sosomok.
Nokotindapou nogi’ Kumoduo Boyoon Montiri I i po nogi’ Presiden Parti Solidariti Tanah Airku (STARSABAH), Datuk Seri Dr. Jeffrey Kitingan om Kumoduo Boyoon Montiri II i po nogi’ Ponowoli Presiden Parti Bersatu Sabah (PBS), Datuk Seri Dr. Joachim Gunsalam.
Wookon lansanon GRS suai i nokotindapou nopo nga’ Presiden USNO, Tan Sri Pandikar Amin Mulia om Presiden Parti Cinta Sabah (PCS), Tan Sri Anifah Aman nogi’ lansanon Parti Gagasan Rakyat Sabah (Gagasan Rakyat), Parti Maju Sabah (SAPP), Parti Liberal Demokratik (LDP) om Parti Harapan Rakyat Sabah (PHRS).
Hajiji po nogi’ Ponorikohon GRS minongomi boboroson di Kumoduo Ponorikohon Perikatan Nasional (PN), Datuk Seri Hamzah Zainuddin i minamarait lansanon om mogigiyon Sabah sabaagi ‘palui’ di ontok minanahak boboroson doid iso’ababayan PN id Sepanggar di kawawagu diti.
Ka di Hajiji, Sabah amu’ momoguno lansanon kipogoyuon miagal dilo’ om yolo’ amu’ apatut rumikot kumaa pogun diti montok mogowit nubasanan mimpulitik mantad Semenanjung.
“Amu’ tokou mimang momuruan miagal diti. Sundung dati’ mamaramit demokrasi, nga’ nubasanan tulun Sabah suai ko’ i ponong hilo’ (Semenanjung). Nung hilo’ mimpalak, pimpalak kou no, nga’ kada’ owito’ kumaa Sabah,” ka disio.
Kohondot dilo’, nunsub di Hajiji mogigiyon mogisuai tinaru, kotumbayaan om sinakagon id pogun diti do misompuru manamong piuludan om monokodung GRS i popiamung walu’ parti nokoiyonon montok koundaran Sabah.
“Ilo’ pogi’ orohian oku mokianu mogigiyon tokou i mogisuai tinaru om kotumbayaan diti, kanou no dati’ misompuru om sokodungo’ no GRS i kapaampai do parti nokoiyonon tokou,” ka disio.
Otumbayaan isio piomungan dilo’ kalantoi Pomilian Agayo Pogun Ko-17 (PRN17) i amu’ no alaid diti tu’ minongomi walu’ parti nokoiyonon i miampai GRS nogogonop ginirot montok tumimbaba’ ponokosahap.
“Nung walu’ parti diti nokopogiamung, otumbayaan oku do aiso’ no i kaanu magala’ id PRN, aiso’ no. Miampai kinalantaion om naangayan tokou apat toun diti amu’ tokou no doti’ aala’ id PRN diti.
“Nunu i oponsol misompuru ginawo tokou, sundung sopisuai pomusarahan, romiton tokou, pantangon tokou. Nga’ soira’ momonsoi kootuson, oiso’ ginawo tokou tu’ ilo’ no i koowit kalantaion kumaa dati’ id PRN do obontol,” ka disio.
Pinoposorou nogi’ isio mogigiyon Sabah mooi do amu’ aampawong di totondos i potonuon id media sosial karait mogisusuai totondos araat kumaa GRS om Koporintaan Pogun maso-maso.
Ka disio, GRS pasanganu rikod pomorintaan di osonong tumanud mogisusuai kinalantaion i nosigampot poómpus lobi apat touon minomorinta’ om apatut onuan mandat kawagu do monilombus kaparagatan koburuon i pinalan maya’ Sondikoton Sabah Maju Jaya (SMJ) 2.0 mimpuun 2026 gisom 2030.
Daamot dilo’, minonugut nogi’ i Hajiji ningkakaton disio di karalanon pulitik i nuru’ poindalanon koporintaan pogun ilo’ nopo nga’ miulud miampai Koporintaan Pisompuruan.
“Saalom dati’ mimpulitik mositi’ tokou haro karalanon. Nuru’ tokou miulud nogi’ miampai Pisompuruan. Yati’ id pogun Malaysia, pogun mositi’ misokodung miampai pisompuruan. Mositi’ tokou maganu pontudukan mantad kaantakan timpu notoliban soira’ amu’ tokou misokodung miampai pisompuruan, nunu i naantakan kumaa USNO om PBS di ontok dilo’, kiguno tokou minsingilo nawawayaán laid.
“Malaysia pomogunon tokou om Sabah pogun tokou, kaakun oku mositi’ manamong Sabah sabaagi walai dati’, nga’ mositi’ tokou miampai do Koporintaan Pisompuruan mooi do koponugat tokou nunu i nosili kopotutan tokou,” ka disio.
Id ababayan dilo’, Hajiji pinapahabar nogi’ kinopoobian RM15 riong montok ponuridong songinan Mini Konvensyen Centre id Keningau montok kogogonopan mogigiyon id watas diti om koiyonon poonsokid.
