Dr. Joachim ruminuba tongo’ mongingindapu’
SANDAKAN: Ponowoli Presiden Parti Bersatu Sabah (PBS) i po nogi Kumoduo Boyoon Montiri II, Datuk Seri Dr. Joachim Gunsalam minampai ababayan “walkabout” kopihondot Toun Wagu Sina i dumontol diti, do hiti di tadau baino’.
Ababayan “walkabout” PBS diti pinaanjur miampai piniuhupan di tolu Luguan Bohogian, ilo nopo PBS Bohogia Tanjong Papat i binuruan di David Ong, PBS Bohogian Karamunting binuruan di David Fong om PBS Bohogian Elopura binuruan di Datuk Linda Tsen, i po nogi Puru Kounsol Akawas PBS.
Dr. Joachim (tanga’), Luguan Bohogian Parti Gagasan Rakyat Sabah (Gagasan Rakyat) Elopura, Datuk Awang Kadin Tang (koonom, gibang), guminambar pongingitanan id Pasar Bandar Kim Fung.
Minonongkounsikou nogi isio kumaa oinsanan puru PBS i nokotindapou om minongunsikou tonggungan tongo Luguan Bohogian i pinapalantoi ababayan diti.
“Tikid toun dumontol Toun Wagu Sina, papaharo tokou ababayan miagal diti. Suab, ababayan miagal maan pohoroo’ id Kota Kinabalu,” ka di Montiri Koporintaan om Pomuwalaian dilo.
Suai ko’ ruminuba’ di tongo mongindapu’, Dr. Joachim pinapatahak nogi ‘limau mandarin’ om kalendar Toun Wagu Sina kuminaa di tongo’ tutumombului.
Dr. Joachim (tanga) guminambar pongingitanan id toguang Pasar Bandar Ramai.
Nakaampai nogi id ababayan dilo’ ii Kumoduo Presiden PBS, Datuk Seri Dr. Yee Moh Chai; Monobubut PBS, Datuk Lu Kim Yen; Timbang Presiden, Datuk Hendrus Anding; Monguhup Monumurat Agayo, Datu Jonnybone Kurum; Luguan Komulakan PBS, Christoper Mandut; koombolutan id Gabungan Rakyat Sabah, nogi tongo Luguan Bohogian PBS.
PBS nga minaganu nogi’ kosiwatan diti montok minamason Kounsikohan Toun Wagu Sina kumaa oinsanan mogigiyon Tionghua id pototongkop Sabah om hinombo nopo yolo.
