KOTA KINABALU: Komulakan Gabungan Rakyat Sabah (GRS) minongunsub Kotinanan Disiplin Univositi Malaysia Sabah (UMS) manahak kopoingatan okodou kumaa mahasiswa mooi do amu’ gumompit id Pitimungan Otoronong ‘Gempur Rasuah Sabah’.
Ka do Utusan Malaysia, Luguan Komulakan GRS, Datuk Jonnybone Kurum minoboros, sabaagi kotinanan balajaran, UMS kiguno papatantu’ susumikul dau moningkanan do akademik om kaparagatan di osonong om okon ko’ gumompit id kaparagatan kiwaya’ araat i kopongumpadan timpu dumontol diolo’.
Ka disio, pongonjuran Pitimungan Otoronong i pohoroon doid Menara Kinabalu do ko 31tw Kohopod om Duo diti kotongoban koponinong kaantakan i kopongumpadan koumoligan tutumanud om tulun ginumuan.
Pitimungan miagal dilo’ nga’ kopomigangau kosimbayanan mogigiyon om tutumombului lolobi no ontok timpu suti’ koompokon toun. Om nogi’, kopomiraag kokitanan pogun Sabah sabaagi rikoton ponombuluyan di otoronong om oulud.
Daamot dilo’, nunsub nogi’ disio PDRM do mambatal permit pitimungan otoronong dilo’ montok no manamong koumoligan om kotoronongon ginumuan.
“Sundung potuu dahai do mamantang kopotutan kosimbayanan susumikul do papaanjur pitimungan otoronong miagal dilo’ nga’, otumbayaan yahai do haal miagal dilo’ aanu popolombus maya’ pogibabarasan om pibarasan miampai bohogian poinggompit.
“Oinsanan totondos kopohompit kes susuap kiguno patahakon kumaa Suruhanjaya Pongilagan Susuap Malaysia (SPRM) om tinan kohokiman montok ponoriukan pointulid. Koindalanon undang-undang momoguno timpu montok papatantu’ tikid bohogian kaanu kaadangan,” ka disio.
Jonnybone i po nogi’ Puru Lintuhun Undangan Pogun (ADUN) Telupid minoboros, susumikul kiguno monidsorou mooi do amu’ poimamangon di nombo-nombo bohogian i kikoponsolon id pulitik.
Pogulu diti, duo tinimungan mamalan papaharo pitimungan otoronong id toguang Menara Kinabalu do ko 31tw Kohopod om Duo diti. Ilo’ kopohompit tinimungan Suara Mahasiswa UMS I papaharo Pitimungan Aman Gempur Rasuah Sabah om kotinanan okon koporintaan (NGO) Gerakan Kuasa Rakyat (G57) i papaharo ‘Himpunan Bangkit Sabahan’ sabaagi kosokodungan di Boyoon Montiri, Datuk Seri Haji Hajiji Haji Noor.
