Dr. Joachim (kotolu, gibang) pinapatahak watikah kinoposilihan kuminaa di John Chryso Masabal sinasi’ dio’ Francis (gibang), Isnin (koduo, gibang) om i Dr. Jamili (wanan).
PENAMPANG: Koporintaan minonimpuun inggisaman ‘pendigitalan’ tumanud ‘prinsip’ 5A, i koowit rati “Accessible by Anyone at Anytime, Anywhere by Any Mobile Device” id siriba’ Sondikoton Sabah Maju Jaya (SMJ).
Kumoduo Boyoon Montiri II, Datuk Seri Dr. Joachim Gunsalam minoboros, konsep diti poposotol koponsolon kapatahakan surupukaraja’ id piromutan i toririmo aanu momoromut disaisai nopo i momoguno dilo’.
Suai dilo’, ilo’ po nogi’ poposotol do haal mogigiyon kapaganu surupukaraja’ do soiraira’ timpu om hinombo-nombo nopo miampai aiso’ sapad kinoiyonon ‘geografi’.
“Id sunduk diti, pokionuon ku kopoindalanan Kounsol Kakadayan Penampang (MPP) popoindalan inggisaman ‘transformasi’ (kosimbanon) pendigitalan kumaa surupukaraja’ MPP montok mongingkawas kopulokison maya’ pomogunaan tiknologi internet id oinsanan haal (Internet of Thing, IoT).
“Maya’ kosimbanon diti, kopoindalanan karaja’, pangkalan ‘data’ (kointalangan), koromuton kointalangan om sistem koporuputan po’outomotikon kumaa sistem digital id po’ompus pogiroromutan kapatahakan (End-to-End). Miampai diti, tikid ‘transaksi’ (pitorinaan) surupukaraja’ id nayatan kopongupalaian, koponompuanan, kuiri, kootusan om kolulusan aanu powonsoiyonon maya’ digital.
“Suai dilo’, inggisaman pendigitalan diti kopoinsanang kapatahakan surupukaraja’ suai ko’ mongingkuri’ kalawason miampai popouyu surupukaraja’ di otulid,” ka disio ontok pinopoimagon Ramai Tuminaru Puruan Kounsol Kakadayan Penampang montok sesi 2024-2026 id ITCC Penampang, di tadau baino’.
Dr. Joachim (poindikau, tanga’) guminambar pongingitanan miampai koinsanai mamaramit watikah kinoposilihan Puru Kounsol montok Kounsol Kakadayan Penampang 2024-2026 om oinsanan tombului naalap di suai.
Dr. Joachim po nogi’ Montiri Koporintaan Koiyonon om Pomuwalaian minoboros, kopiongoi di kinopoingkawasan rontob Kounsol Watas Penampang kumaa ko’oitan kakadayan, nokopongimbulai kinopomoruhangan tonggungan kotinanan ilo’ nopo nga’ tonggungan Koburuon Labus Kakadayan om Mogigiyon.
Suai mantad dilo’ surupukaraja’ kakadayan, koponguludan MPP mositi’ no do moningkanan kumaa koiyonon labus kakadayan, ka disio I mokianu sokodung mantad tongo’ koupisan om kotinanan ngaawi’ di suai nga’ oponsol nogi’ id kopoindalanan karaja’ ngaawi’ om tinonggungan Kounsol miampai lobi kiwaya’ id koponumboyoan koburuon watas.
“Kalansanan pisokodungan diti kopongingkawas sistem kapatahakan koporintaan kumaa mogigiyon om kapanahak asil kiwaya’ akawas i okon nopo ko’ manahak waya’ kumaa naangayan Kounsol Kakadayan Penampang nga nogi’ kumaa tongo’ koupisan om kotinanan di poinghompit,” ka disio.
Minanangkabahayan kumaa 24 Puru MPP binuruan di Presiden dilo’, Francis Chong i kapaampai mantad nayatan tinimungan abaal om kinawawaya’an, Dr. Joachim minokianu diolo’ i nonuan mandat do papatahak kouhupan ginoris om kabaalon kumaa MPP.
“Kootusan ngaawi’ di maan wonsoiyo’ mositi’ no do popo’iliu koponsolon ginumuan sabaagi tingkananon. Tonggungan Puru Kounsol oponsol kopio lolobi no id kapamansaian kootusan om popoimagon kooturan, katatapan, kopoindalanan karaja’ om koundangan bohogian kikuasa’ kinoiyonon,” ka disio.
Pinokianu disio yolo’ papatahak tonggungan poinponu’ id kopoindalanan tinonggungan, tu’ kinoposilihan nopo dilo’ nga’ iso’ i mositi’ no do papanahon.
“Kada’ do amu’ momoduli’ kinoposilihan sabaagi Puru Kounsol.
“Kinoposilihan diti nopo nga’ iso’ tonggungan, okon i ko’ kosiwatan montok monumboyo’ koponsolon tinan sondiri’, tongo’ tambalut toi ko’ tongo’ koobpinoian.
“Kogunaon om koponsolon ginumuan mositi’ onuan koposuulan. Kohondot dilo’, igitai no tonggungan di pinatahak miampai pointulid, poinponu’ ginawo, id tinonggungan. Sabaagi Puru Kounsol, yokoyu nga’ ponokomobi’ mogigiyon id kinoiyonon dilo’ om uhupai no Kounsol Kakadayan Penampang id koponoibahan tongo’ kobolingkahangan ngaawi’ maso-maso.
Otumbayaan isio, miampai haro tonggungan poinponu’ om pisokodungan id nayatan tongo’ Puru Kounsol om bohogian koponguludan Kounsol Kakadayan Penampang, hontolon montok manahak surupukaraja’ bobos osonong kumaa mogigiyon aanu monigampot.
Status MPP pinoimagon di ko’ 6tw Koonom 2024.10.3
Nokotindapou nogi’ i Monguhup Montiri I, Komontirian Koporintaan Koiyonon om Pomuwalaian, Datuk Isnin Aliansih; ADUN N.25 Kapayan po nogi’ Ponorikohon Koperasi Koburuon Desa (KPD), Jannie Lasimbang; Puru Lintuhun Dewan Negara, Senator Datuk Noraini Idris; Presiden Koisaan Koubasanan Kadazan Dusun (KDCA), Tan Sri Joseph Pairin Kitingan; Ponorikohon SME Corp Malaysia, Tan Sri Bernard Giluk Dompok; Kumoduo Presiden KDCA po nogi’ Ponorikohon Tinan Popisamo KDCA Watas Penampang om Putatan, Datuk Seri Clarence Bongkos Malakun; Ponorikohon Yayasan Bumiputera Sabah, Datuk John Ambrose; Monunurat Tolisok Totuo kumaa Boyoon Montiri, Datuk Ceaser Mandela Malakun om Monunurat Pointatap Komontirian, Datuk Dr. Jamili Nais.
