Hajiji (tanga’) miampai di Rubin, lansanon parti komponen Gabungan Rakyat Sabah (GRS) guminambar miampai tongo’ mongongobi’ om puru ngaawi’ Gagasan Rakyat Bohogian Kemabong.
TENOM: Boyoon Montiri, Datuk Seri Haji Hajiji Haji Noor minanahak jominan do papatantu’ somboogian tana’ id koiyonon Sabah Forest Industry (SFI) id watas diti polobuson om pohimogonon sabaagi tana’ kokompungan.
Ka disio, pipiro noribu hektar tana’ id koiyonon pasanganu kotolunan komponi dilo’ nointutunan no montok polobuson mooi do mogigiyon kaanu tumilombus mongingiyon miampai pohimagon.
Hajiji (tanga’) ruminamit dokumen kopokionuan tana’ kopotutan mogigiyon Watas Okoro’ Kemabong mantad mobi’ lansanon nokoiyonon id ababayan kinopoimaganan Mitingan Tikid Toun Parti Gagasan Rakyat Sabah Bohogian Kemabong 2024.
Id timpu miagal, ka disio isio nga’ monuhu’ nogi’ Koupisan Tana’ om Monunukat (JTU) do popoindalan ababayan Surupukaraja’ Tana’ Adat Pogun Sabah (PANTAS) id watas diti.
Minoboros isio, ilo’ montok manalasai tana’ di alaid no noiyon-iyon om nobuat mogigiyon kampung aanu monukat om polobusan garan kumaa sanganu dilo’.
“Poboroson ku do potontuon tokou pipiro noribu hektar tana’ id SFI polobuson montok kokompungan mogigiyon dati’ id Tenom.
“Ingkaa nogi’ tana’ i amu’ po nosukat, pokionuon ku Potunud JTU do momoguno ababayan PANTAS montok monukat tana’ mogigiyon mooi do tana’ i alaid no nobuat oonuan garan,” ka disio ontok minoboros id Ababayan Kinopoimaganan Mitingan Tikid Toun Parti Gagasan Rakyat Sabah (Gagasan Rakyat) Bohogian Kemabong id Lintuhun Sri Ontoros, Kemabong, doros hiti id tadau baino’.
Hajiji minanahak sisimbar kumaa pipiro atag pinotoguang di Luguan Bohogian Gagasan Rakyat Kemabong, Datuk Rubin Balang kopohompit di koponsolon mogigiyon koiyonon dilo’.
Minoboros id kapahabaran talbi dilo, Hajiji minoboros lohowon disio komponi dilo’ montok miboros atag montok papalabus somboogian tana’ SFI dilo’.
