Hajiji miampai di Anwar om puru tinonudan Malaysia tuminoguang di Sultan Hassanal Bolkiah katalib ramai suminain MoU id Istana Nurul Iman di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor minoboros, Pibarasan Lansanon Tounan kapanahak koundaran om sopikalantoi pialatan Malaysia om Brunei.
Minoboros isio, iti kapasaga’ goduduo pomogunon maya’ pisokodungan poinggayo id sunduk piromutan Malaysia-Brunei di ogirot om nogi’ Sabah-Brunei.
Boyoon Montiri minananud di Luguan Montiri, Datuk Seri Anwar Ibrahim kuminaa ALC Malaysia-Brunei Darussalam Ko-25, pirubaan nayatan akawas goduduo pomogunon i pinoindalan id Istana Nurul Iman doid Bandar Seri Begawan, Brunei Darussalam, di tadau baino’.
Id ALC, lansanon goduduo pomogunon – Brunei i binuruan di Sultan Hassanal Bolkiah, nokopokito ababayan minisain Memorandum Pihunungan om ‘Instrumen’ Misulak id pialatan Koporintaan Malaysia om Brunei Darussalam.
Suai ko’ mongukab kosiwatan wagu montok koundaran goduo, koburuon pisokodungan misulak di haro mantad nga’ pinibabarasan id pinirubaan dilo’.
Id kinotombuluyan dilo’, Luguan Montiri do wookon tinanud di Montiri Labus, Datuk Seri Mohamad Hasan; Montiri Kopoopuan, Pidagangan om Pomorunan, Tengku Datuk Seri Zafrul Tengku Abdul Aziz; Kumoduo Premier Sarawak, Datuk Amar Awang Tengah Ali Hasan om pipiro montiri totuo Pisompuruan om nogi’ pogun.
