Dr. Joachim (tanga’), Dr. Jamili (kaapat, wanan) om oinsanan i nokotindapou guminambar pongingitanan id kinotombuluyan apantang JPUANS, doid Wisma Innoprise, di tadau baino’.
KOTA KINABALU: Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minamaramit kotombuluyan apantang mantad Puruankuasa’ Induk Ponuridongan, Ponimbanan om Pogintangan Kawagu Undang-Undang Adat Mamasok Pogun Sabah (JPUANS) id upis disio doid Wisma Innoprise, do hiti di tadau baino’.
Ontok kinotombuluyan dilo’, nonuan isio kopointalangan di Luyar id Koupisan Luyar Agayo Pogun Sabah i po nogi’ Monontuduk Totuo Undang-Undang Komontirian Koburuon Labus Kakadayan om Haal Mamasok Pogun, Dulce Majawit.
Kointalangan di pinatahak nopo karait hontolon minonuridong JPUANS maya’ Kounsol Haal Mamasok Pogun Sabah (MHEANS) ilo’ nopo montok monorisid om mogiboboros di toisoiso’ katatapan undang-undang Mamasok Pogun id sunduk ponuridongan, ponimbanan nogi’ kopogintongan kawagu undang-undang adat Mamasok Pogun i alaid no kiguno onuan kopomodulianan.
Dr. Joachim minoboros, kotombuluyan apatang nopo dilo’ montok monumboyo’ angkab id atag ponuridongan Koupisan Kohokiman Kuut Mamasok Pogun Sabah miagal pinahabar di Boyoon Montiri, Datuk Seri Haji Hajiji Haji Noor di wulan Koduo katatalib.
Ilo’ nopo nga’ iso’ kosimbanon i kapabantug undang-undang adat Mamasok Pogun potilombus dino kapanahak kokitanan di akawas om kitonggungan kumaa tongo’ Luguan Adat id kuut.
Suai ko ilo’, montok po nogi’ dilo’ do mongingkawas rontob sistem kohokiman Kuut Mamasok Pogun i kotopong di Kuut Sivil om Kuut Syariah.
Nokotindapou nogi’ i Monunurat Pointatap Komontirian, Datuk Dr. Jamili Nais; Presiden MHEANS, Tindarama Dr. Benedict Topin om Beverly Judin; Kumoduo Ponorikohon SPANS, Datuk OKK Stephen Sondoh; Koupisan Haal Mamasok Pogun Sabah, Syaheeda Hamdani; Sabah Law Society, Datuk John Sikayun; Mobi’ Luguan Watas, OKK Edna Majimbun, (MAN KK); om puru Juprin Wong Adamal.
