Hajiji (tanga’) suminasi’ kinapatahakan replika cek mantad di Mohamad (koduo, wanan) kuminaa di Dr. Jeffrey.
KOTA KINABALU: Boyoon Montiri, Datuk Seri Haji Hajiji Haji Noor suminasi’ kinapatahakan ‘replika’ cek kiginumu’ RM33,593,226 mantad di Montiri Pomutanaman om Kojominon Takanon Pisompuruan (KPKM), Datuk Seri Mohamad Sabu kuminaa di Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Akanon, Datuk Seri Dr. Jeffrey Kitingan do hiti, konihab.
Ababayan dilo’ pinaharo ontok kinotombuluyan apantang di Mohamad kuminaa di Hajiji id kinoiyonon pinotomod Boyoon Montiri, Sri Gaya.
Nokotindapou nogi’ i Kumoduo Montiri KPKM, Datuk Arthur Joseph Kurup om Monguhup Montiri Pomutanaman, Ponginsadaan om Pomorunan Akanon, Datuk Hendrus Anding.
Kinopoobian nopo dilo’ nga’ montok popoindalan inggisaman mongingkawas kojominon takanon id pogun diti, wookon dilo’ kapagarasan pomutayaman mogiamung ‘ruminan’ om ponondulian tongo’ ranahon songinlogos.
Daamot dilo’, Boyoon Montiri minonongkounsikou nogi’ mantad kopusohon Koporintaan Pisompuruan maya’ KPKM id koponguhupan inggisaman koporintaan pogun do mongingkawas kojominon takanon id pogun diti.
Hajiji minoboros, koporintaan pogun nga’ pointootopot mongingkawas rontob kosukupan tinan (SSL) asil pomutanaman lolobi no parai kaampai nogi’ manampasi kawagu Kotinanan Parai om Watas Sabah, suai ko’ pinopoindalan pipiro inggisaman montok mongingkawas SSL watas mantad 22 pihatus toun diti kumaa 31 pihatus do toun 2025.
Kapt:
