Dr. Joachim (tanga’) guminambar pongingitanan miampai koinsanai i nokotindapou id Mitingan Agayo Toun-toun tolu bohogian.
KOTA KINABALU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam mokianu parti popoinlipat inggisaman montok momoruhang kosompuruan kaampai no mantad nayatan sukod wagu.
Minoboros isio, oponsol iti sabab ginaras sosonginan parti adangon mantad ginumu’ puru dau.
“Oinsanan lansanon om puru kaampai id nayatan guas kiguno papamanau tonggungan id kopomoruhangan kosompuruan tokou, kaampai mongimbayat lobi kogumu’ mantad nayatan komulakan do sumompuru parti,” ka disio ontok minoboros pinopohimagon Mitingan Agayo Toun-toun (AGM) tolu bohogian – PBS Bohogian N19 Likas, PBS Bohogian N20 Api-Api om PBS Bohogian N21 Luyang, id Lintuhun Hakka, di konihab (ko 9tw Koonom).
Dr. Joachim po nogi’ Kumoduo Boyoon Montiri II nga’ mokianu nogi’ tongo’ puru PBS do toririmo kipomusarahan kumaa toguang, kaampai id pomogunaan tongo’ karalano’ wagu di haro id timpu diti doid kopongimbayatan lobi kogumu’ sukod wagu sumompuru parti.
Nokotindapou nogi Kumoduo Presiden PBS i po nogi’ Luguan Bohogian PBS Api-Api, Datuk Seri Dr. Yee Moh Chai om sawo dau i po nogi’ Luguan Koonduan, Datin Seri Vicky Yee; Luguan Kopointalangan PBS, Datuk Joniston Bangkuai; Luguan Kopointalangan PBS Api-Api, Yee Tsai Yue; tongo’ Luguan Bohogian, Goon Thien Shang, Dr. Joseph Lee; tongo’ Puru Kounsol Akawas om nogi’ Exco Tinimungan Koonduan om Komulakan.
