Hajiji (tanga’) miniboros miampai Monunurat Koporintaan Pogun, Datuk Seri Sr. Safar Untong katalib mitingan puruankuasa Kabinet Koupisan Boyoon Montiri.
KOTA KINABALU: Koporintaan Pogun kiatag papaharo piromutan rahat pialatan Kudat om Palawan, Filipina montok mononduli’ ikonomi Kudat, ka di Boyoon Montiri, Datuk Seri Haji Hajiji Haji Noor.
Minoboros isio, haal dilo’ nopibarasan miampai di Montiri Padsakaian Pisompuruan Anthony Loke i talib dilo’ minooi intong Kudat miampai Puru Parlimen Kudat, Datuk Verdon Bahanda.
“Miampai papaharo surupukaraja’ feri, pidagangan miolon barang id Kudat aanu manampasi kawagu,” ka disio id mitingan talib kabinet Koupisan Boyoon Montiri id Menara Kinabalu do hiti di tadau baino’.
Pidagangan miolon barang kouhup mononduli’ ikonomi Kudat di asagub, ka di Hajiji i minoboros do pongukaban dodopiton Kudat nga’ pikikiro kosili koiyonon dumapit di tongo’ kapal i lumoyog mantad kabaatan Mindanao kumaa Labuan.
“Id timpu diti, kapal rahat i mogowit babarang mantad Mindanao Kabaatan tumilombus kumaa Labuan. Nung ukaban tokou dodopiton Kudat, kopomoguno tokou waya’an perkapalan Mindanao Kabaatan – Labuan,” ka disio.
Ka disio, Dodopiton Kudat kiharo nondo oinsanan kogogonopan i gunoon lolobi no kopio longkod pomorisaan Kositum, Imigrisin, Kuarantin om Koumoligan.
Boyoon Montiri minoboros do nokopiboros nogi’ isio do haal dilo’ miampai di Pesuruhjaya Pulis Sabah montok mintong sunduk koumoligan montok pibabarasan id Kounsol Koumoligan Pogun.
Naamot dilo’, Hajiji minoboros, oinsanan upisor Koporintaan Pogun kiguno mamarati poinponu’ komoyon do katatapan “Sabah First” (Sabah Poguluonon).
“Sabah First kirati do mositi’ tokou poposuul koponsolon Sabah id koinsanai inggisaman tokou. Mangangapu’ labus om okon Sabah i orohian monuridong inggisaman pongindopuan do hiti mositi’ kiharo koponsolon nokoiyonon Sabah i mongigit 30 pihatus koundaran id piindopuan dilo’,” ka disio.
Hajiji minoboros, Kabinet Pogun nga’ pinopolulus po nogi’ pogintangan kawagu Skim Koponginwoguan Kakadayan Agayo Sembulan do Dewan Bandaraya Kota Kinabalu.
“Koporintaan Pogun kaakkun papasaga’ sanganu tana’ miyon do hilo’ soira’ nopo opongo kopoburuan miampai pampasan kousinan di nopiokunan,” ka disio.
Boyoon Montiri nga’ pinapahabar nogi’ do Sabah kosili mananwalai kapamaramaian Tadau Malaysia toun diti do ko 16tw kosiam.
Montiri Ponombuluyan, Koubasanan om Sandad Posorili’ Pogun, Datuk Christina Liew monorikohon puruankuasa’ manganganjur miampai Montiri Piromutan Pisompuruan, Fahmi Fadzil.
