Rosmadi suminain buuk tombului ontok pinapaharo kinotombuluyan id upis Kumoduo Montiri MOSTI.
KOTA KINABALU: Komontirian Sains, Tiknologi om Inovasi (MOSTI) minamaramit osonong atag pisokodungan Sabah Maju Jaya (SMJ) id kopomogunaan tiknologi montok monoribau kobolingkahangan mogigiyon id pogun diti.
Kumoduo Montiri dilo’, Datuk Mohammad Yusof Apdal minoboros, maya’ pusokodungan miampai koporintaan pogun, MOSTI miampai kotinanan dau kopongintutun ‘produk’ (asil nimbulayan) nogi tiknologi i kouhup koporintaan pogun Sabah.
Ka disio, pipiro pinibabarasan lobi moningkanan kumaa mongukab kosiwatan goduduo bohogian montok misokodung id pomogunaan tiknologi kosuul no monoribau kobolingkahangan mosikin ‘tegar’ (poindala’) id Sabah.
Rosmadi ontok pinapawalad karatas atag id upis MOSTI.
“Wookon kobolingkahangannmosikin tegar pointoguang mogigiyon Sabah nopo aiso’ walai, Indeks Jisim Tinan (BMI) osiriba’ mantad rontob noubasanan gama-gama’ okurian ‘nutrisi’ di aadang.
“Suai dilo’, aiso kogogonopan impuunon nogi’ aiso’ naangayan balajaran di osonong wookon pinibabarasan miampai tinonudan Luguan Upisor Mongungulud Sekretariat Sabah Maju Jaya (SMJ), Koupisan Boyoon Montiri Sabah, Datuk Rosmadi Datu Sulai, di tadau baiino’,” ka disio id kointalangan media di tadau baino.
Mohammad Yusof ontok minoboros id ababayan dilo’.
Naamot dilo, ontok pinapawalad iso’ karatas karaja karait sistem SMJ Profiling, Rosmadi minoboros, karalano’ poposuang kointalangan nindopuan, kinoiyonon, ginumu suang walai nogi kointalangan di poinggompit karait kobolingkahangan komosikinan mogigiyon id Sabah.
“Suai dilo, iso’ po pisokodungan numingad SMJ miampai MOSTI nopo karait do kaganaan id ikonomi obulou.
“Kopuli ilo do farmaseutikal montok bioteknologi marin, pongiduan tusi’ (desalination) montok pangaba waig, perkapalan, kopoburuan tisa rahat nogi kopiantangan om kapanamangan rahat,” ka di Rosmadi pinopointalang.
