Hajiji i po nogi’ Presiden Parti Gagasan Rakyat Sabah (Gagasan Rakyat) tuminindapou id Ramai Walai Poingukab Aidilfitri pinaanjur piomungan 7 bohogian Gagasan Rakyat id Lintuhun Mogigiyon Tawau, di tadau baino’.
TAWAU: Boyoon Montiri, Datuk Seri Haji Hajiji Haji Noor nopo nga’ wookon tombului i nokotindapou doid Ramai Walai Poingukab Aidilfitri pinaanjur piomungan 7 bohogian Parti Gagasan Rakyat Sabah (Gagasan Rakyat) id Lintuhun Mogigiyon Tawau di tadau baino.
Lobi 10,000 tulun mogigiyon orukut tinaru om ugama’ nokotindapou doid ramai dilo’ i piniuhupan papaanjur di Gagasan Rakyat Bohogian Balung, Apas, Sri Tanjung, Kukusan, Tanjung Batu, Merotai om Sebatik.
Hajiji ruminuba’ om pinapatahak toluod kumaa tinimungan asnaf id Ramai Walai Poingukab Aidilfitri pinaanjur piomungan 7 bohogian Gagasan Rakyat id Lintuhun Mogigiyon Tawau, di tadau baino’.
Hajiji po nogi’ Presiden Gagasan Rakyat, ruminuba’ om pinapatahak nogi’ do toluod kuminaa di 80 tulun asnaf id ramai dilo’.
Minoboros kumaa magaganu habar, ka di Hajiji, Ramai Walai Poingukab kaanu popogirot piromutan ‘silaturahim’ om piuludan id nayatan mogigiyon mogisuai tinaru om ugama’ id pomogunon diti kaampai no id Sabah.
Ka disio, id koyuon pamaramaian Tadau Raya, yolo’ i amu’ songkuro kinonosipon nga’ amu’ lihuan kaampai OKU om asnaf, i mositi’ ropohon om onuan ponguhupan mooi do kaanu yolo’ tumonggoi mamaramai Tadau Raya.
Hajiji miampai di Kadzim tumindapou Ramai Walai Poingukab Aidilfitri Datuk Haji Tahir Picho id Seri Indah Regency Tawau di tadau baino’.
Nokotindapou nogi’ i Speaker Lintuhun Undangan Pogun, Datuk Seri Haji Kadzim M. Yahya, montiri om tongo’ monguhup montiri, mongongobi’ rayat om tongo’ luguan mogigiyon.
Pogulu pinoungkoyutan minuli’ kuminaa Kota Kinabalu i Hajiji pinoposiwat nogi’ do timpu tuminindapou Walai Poingukab Tadau Raya di Datuk Haji Tahir Picho id Seri Indah Regency, Tawau.
