Hajiji minonorikohon mitingan talib kabinet Koupisan Boyoon Montiri (JKM) id Menara Kinabalu, Kota Kinabalu, di tadau baino’.
KOTA KINABALU: Kabinet Pogun kaakun montok mamasi kawagu Kotinanan Parai om Wagas Sabah (Lembaga Pagi dan Beras Sabah) sabaagi wookon mantad inggisaman montok mongingkawas kopolobusan taakanon om papatantu’ koumoligan taakaon id pogun diti.
Boyoon Montiri, Datuk Seri Haji Hajiji Haji Noor minoboros, kopomosian kawagu kotinanan dilo’ nopo nga’ oponsol sabab Sabah do noondo mongudar kikiro 70 pihatus mantad kopomogunaan wagas dau.
“Sabah kiguno mongingkawsa kosukupan tinan takanon dau om popowonsoi tokou dilo’ miampai manampasi kawagu Kotinanan Parai om Wagas Sabah.
“Kabinet Pogun popotoguang atag kumaa di Molohingon Pogun montok kopolulusan ponuridongan Kotinanan Parai om Wagas Sabah miagal di poinsuang id Seksyen 3 Enakmen Kotinanan Asil Pomutanaman 1981,” ka disio id mitingan talib kabinet Koupisan Boyoon Montiri (JKM) id Menara Kinabalu, do hiti, di tadau baino’.
Id laang di okodou, Boyoon Montiri minoboros, Kabinet Pogun nga’ kaakun nogi’ manahak kapasagaan pinotomod kumaa mangangapu’ i poindalan id taman pomorunan doid pogun diti montok poposodia’ kogogonopan kopongimbulaian ginoris montok kogunoon diolo’ sondiri.
“Laang diti oponsol montok mongimbayat mangangapu’ om monimporon diolo’ i nokoindalan no i noumpadanan gama-gama’ kobolingkahangan lotirik,” ka disio.
Hajiji minoboros, id inggisaman montok mongingkuri’ kopokionuan ginoris id Sabah, Kabinet nga’ pinapatatap montok papasaga’ walai kadai, linimput om premis tiiyonon popodokot sondiri’ sistem ginoris solar miampai amu’ maganu kolulusan mantad Sabah Electricity Sdn. Bhd. (SESB).
Karait ababayan Rumah Keduaku Sabah (SBH-MM2H), Nuludan Montiri nga’ pinopolulus rontob tinuno (umur) mongungupalai kumaa 30 toun poingkawas om papasaga’ tutumanud ababayan dilo’ papadagang harata’tana’ diolo’ katalib limo toun miampai kosudongan do kiguno yolo’ momoli walai wagu kigatang amu’ okuri’ ko’ mantad RM600,000.
Minoboros i Hajiji, id siriba’ katatapan wagu dilo’, koposilihan ejen SBH-MM2H mositi’ no do mantad komponi nokoiyonon Sabah.
