Hajiji pinapatahak toluod Koporintaan Pogun kumaa Bomba om Monumpasi Sabah, rinamit di Potunud dilo’ Abdul Razak Muda.
KOTA KINABALU: Boyoon Montiri (KM), Datuk Seri Haji Hajiji Haji Noor minonuhu’ pangaba’ waig poikidon kumaa 58,080 Luguan Suang Walai (KIR) kapaampai 355 tinan kampung id 12 watas doid pototongkop pogun i noumpadanan gama-gama’ pagagadau di anaru.
Montok tuduan diti, Koporintaan Pogun pinopoobi’ soginumu’ RM7.5 riong miampai sokodung Kotinanan Ponguludan Kadaaton Negara (NADMA), ka disio.
“Koupisan Waig Pogun om Longkod Panamangan Karaja’ Kadaaton (PKOB) id watas di noumpadanan do noondo mamaso popoikid waig kumaa mogigiyon,” ka disio.
Watas di nadalaan gama-gama’ kinokurion waig nopo nga’ Tongod, Tuaran, Papar, Keningau, Semporna, Kota Belud, Tenom, Pitas, Kota Kinabalu, Penampang, Kukdat om Tawau.
“Loji pongubatan waig id koiyonon pogogonuan muu-tuu gama-gama’ pagagadau pointonod di pintangaan wulan Koduo 2024 om lobi kogumu’ koiyonon di oumpadanan nung kotilombus no koyuyuon,” ka disio id ramai kinapatahakan ponguhupan kumaa Koupisan Bomba om Monumpasi id Menara Kinabalu do hiti di tadau baino’.
Hajiji (tanga’) nonuan kopointalangan karait koyuon maso-maso kinotutudan gouton om kongungutan di Potunud Bomba om Monumpasi Sabah Abdul Razak Muda.
‘Pembenihan Awan’ mimpuun suab
Boyoon Montiri minoboros Koupisan Meteorologi Malaysia (MET Malaysia) pinapaatag karaja’ ‘pembenihan awan’ id koiyonon di noumpadanan gama-gama’ koyuon alasu’ om otuu do ko 28tw gisom ko 30tw Kotolu.
“Karaja’ pembenihan awan tumanud di pongiikiraan ‘atmosfera’ tawan di kosudong montok momonsoi rasam nung powonsoiyonon pembenihan awan,” ka disio i pinopoilo do kos maan tonggungo’ poinponu’ do NADMA om Susumangod Tawan Diraja Malaysia i poinlongkod doid Labuan i poposodia’ sokodung kogogonopan maya’ sokdoung Upis Hal Suang Pogun om Ponolidikan Koupisan Boyoon Montiri.
“Kalansanan tokou karaja’ pembenihan awan koindalanan osonong om kapanahak rasam id koiyonon di noumpadanan id Sabah,” ka disio.
Hajiji minoboros, Koporintaan Pogun pinopoobi’ RM267,444 kumaa Koupisan Bomba om Monumpasi montok kogunoon diolo’ momoli kakamot pomoruhang do momisok kotutudan gouton om kongungutan id koiyonon di naantakan id pogun diti.
Kakamot dilo’ kaampai 27 poom asanang popoundaliu, 75 poom ‘anduh’ haro motor om 906 unit pomisok tapui.
Gisom di ko 26tw Kotolu katatalib, soginumu’ 1,392 kes kinotutudan gouton om kongungutan pinoruput i nokopomunso 9,392.23 ekar id pototongkod pogun.
Mantad ginumu’ diti, kikiro 8.55 ekar id koiyonon patataaman rinomos Kayu Madang kakal amu’ po nasansaban poinponu’.
“Gisom noondo, Koupisan Bomba om Monumpasi Malaysia nokopogura’ 319 puru bomba id pototongkop Sabah. Koporintaan Pogun tumaru montok manahak ponguhupan kumaa koupisan dilo’ do manalob kotutudan,” ka disio.
