Hajiji (wanan) sinuau dilo wookon susumikul i nokotindapou kopihondot Ramai Mongukab Puasa Kotinanan Pinsingilaan Akawas id Semenanjung Miampai Boyoon Montiri Sabah.
KOTA KINABALU: Boyoon Montiri (KM), Datuk Seri Haji Hajiji Haji Noor pinapahabar kopoobian soginumu’ RM10 riong montok ponguhupan subsidi tikit pontuludan kumaa koinsanai susumikul Sabah i minsingilo id kotinanan pinsingilaan akawas (IPT) koporintaan doid Semenanjung, Sarawak om Labuan.
Pinapahabar isio ponguhupan dilo’ ontok kinotombuluyan doid Pulau Pinang montok Ramai Mongukab Puasa Miampai Mahasiswa Mahasiswi Kotinanan Pinsingilaan Akawas doid Semenanjung id Goerge Town di baino’.
Hajiji guminambar miampai wookon susumikul i nokotindapou kopihondot Ramai Mongukab Puasa Kotinanan Pinsingilaan Akawas id Semenanjung Miampai Boyoon Montiri Sabah.
Ka disio, ponguhupan pinotomod one-off soginumu’ RM600 songulun kumaa susumikul Sabah nopo dilo’ nga’ kousinan mantad kopoobian pinotomod Boyoon Motiri.
“Ponguhupan pinotomod tikit pontuludan one-off diti patahakon mitilombus kumaa susumikul di komoyon. Poingkuro po, kointalangan osorisid om karalano’ kapambayaran maan pibabarasai lobi kosorisid di tongo’ bohogian poinggompit.
“Ponguhupan pinotomod diti aanu gunoon do soiraira’ nopo timpu montok muli’ kumaa Sabah,” ka disio.
