Hajiji minomorisa’ rontob kinoosinon id sauk waig LRA EWSS Limbahau di tadau baino’, om poingintong i Shahelmey nogi’ ilo suai.
PAPAR: Boyoon Montiri, Datuk Seri Haji Hajiji Haji Noor minonuhu’ do Koupisan Waig om Jetama Sdn. Bhd. momonsoi sauk koduo montok popoluyung waig kumaa Loji Pongubatan Waig (LRA) Skim Pangabaan Waig Aarau-arau (EWSS) id Kampung Limbahau do hiti.
Sauk waig koduo i pinaatag id Kampung Kabang i poinsumpak lobi kosodu’ id saa’ Baang Papar montok mongilag kosugkuan waig oosin aantakan kawagu i nokopononsog LRA EWSS somponon poinponu’.
“Atag sauk waig koduo id Kampung Kabang kosili panalasaian kumaa hal koosinon di akawas id sauk waig kumoiso’ id Kampung Limbahau,” ka disio soira’ rinubaan katalib minooi intong LRA EWSS Limbahau di tadau baino’.
Montiri Pidagangan Suang Pogun om Kos Kosukupan Masi, Datuk Armizan Mohd. Ali po nogi’ Puru Parlimen Papar, pinapaatag sauk waig koduo di bobos kiginoris montok gunoon sabaagi sauk waig suai montok koonuan pangaba’ waig mata’ soira’ sauk id poinharo mantad kikobolingkahangan.
Hajiji om Shahelmey minooi intong sauk waig suai Jetama id Kampung Kabang hinombo do sauk waig koduo monotk LRA EWSS Limbahau pinaatag.
Boyoon Montiri nonuan kopointalangan di Injinior Waig Watas Papar, Afiq Abqari Nain do rontob koosinon id sauk waig LRA EWSS Limbahau nakatalib 4,000 miligram sonliter (mg/L), ilo’ nopo nga’ osodu’ kinotolibon ko’ mantad di sitandod bobos akawas i 120 mg/L noo.
Waig oosin nokosuang kisinodu’ 13km kuminaa Baang Papar, nakatalib di pogogonuan waig LRA EWSS Limbahau, i poinsumpak kikiro 8km mantad kabang Baang Papar.
Hajiji nga’ pinoilo nogi’ do kinoponomponan LRA EWSS Limbahau pointonod di ko 17tw Koduo miampai duo loji waig suai id Papar ilo’ nopo nga’ Jetama om Kogopon i amu’ noukaban poinponu’, nokoowit kinoingkurion kopolobusan kumaa 35 riong liter sangadau (MLD) nung piadangon di ginumu’ poinponu’ dilo’ 63 MLD.
“Tuminingan oku do hiti di tadau baino’ montok minooi intong koyuon kopio id Papar i momoguno laang pogisokodungan mantad koinsanai kotinanan poinggompit. Tumanud kopointalangan mantad Upisor Watas, Injinior Watas om Potunud Waig Pogun okito ku o laang di naanu montok momoluku koinggoritan mogigiyon,” ka di Hajiji.
“Oponsol kopio dati’ popowonsoi nunu nopo i aanu tokou monotk monguhup mogigiyon,” ka disio kawagu.
Boyoon Montiri nonuan kopointalangan do kinoponomponan EWSS om pagagadau di alaid nokoowit kinokurion di adala’an i nokopongumpadan kikiro 150,000 tulun id koiyonon dilo’.
Hajiji nonuan kopointalangan di Suhaimi karait kinopogintongan koinsanai pangaba’ waig ontok timpu magadau id Sabah.
Id kopointalangan disio, i Upisor Watas, Mohd. Fuad Abdullah minoboros, Upis Watas pinapaaba’ waig minomoguno luri tangki waig mitilombus kuminaa diolo’ di noumpadanan om apat tangki poundorong.
Waig nga’ aanu nogi’ id longkod upis Koupisan Waig Watas.
“Kalansananku kapaatadan pangaba’ waig momoguno luri tangki waig tilombuson om nung kiguno, Koporintaan Pogun mambayar bil pomoruhang waig,” ka di Hajiji.
Id timpu miagal, minoboros isio, ‘pembenihan’ haun masaan adangon id koiyonon ponimungan waig tumnaud do haun di kosudong.
Daamot dilo’, Potunud Koupisan Waig Pogun, Suhaimi Asbullah minoboros, kopolobusan waig id pototongkop pogun nokoinsiriba’ kuminaa 1,466.29 riong liter sangadau (JLH) nung piadangon di kopolobusan kasasari’ 1,534 JLH nosusuhut kinoponomponan LRA Limbahau EWSS om LRA Sebatik.
Talib ilo’, i Hajiji minooi nogi’ intong sauk waig suai Jetama id Kampung Kabang hinombo do sauk koduo montok LRA WESS Limbahau minaan paatago’.
Nokotindapou nogi’ Kumoduo Boyoon Montiri II po nogi’ Montiri Karaja Agayo, Datuk Ir. Shahelmey Yahya; Monguhup Montiri Karaja’ Agayo, Datuk Limus Jury om i Datuk Robert Tawik; ADUN Kawang, Dato’ Sri Ghulamhaidar Khan Bahadar; Monunurat Pointatap Komontirian Kousinan, Datuk Sofian Alfian Nair om Potunud Unit Pamalanan Ikonomi, Datuk Jasmine Teo.
